નવી દિલ્‍હી, તા.૩૦: જો તમને પણ એર ઇન્‍ડિયાની ફ્‌લાઇટમાં મુસાફરી કરવાનું ગમે છે, તો તમારા માટે ખૂબ જ તણાવપૂર્ણ સમાચાર છે. ભારતના ઉડ્ડયન સુરક્ષા નિયમનકાર નાગરિક ઉડ્ડયન મહાનિર્દેશાલય એ એર ઇન્‍ડિયા સંબંધિત ૧૦૦ ખામીઓ જાહેર કરી છે. તાજેતરના ઓડિટ પછી ડીજીસીએએ આ ખુલાસો કર્યો છે, જે મુસાફરોની સુરક્ષા માટે ગંભીર ચિંતાનો વિષય છે. DGCA એ તેના રિપોર્ટમાં સાત લેવલ-૧ ખામીઓ શોધી કાઢી છે. આનો અર્થ એ થયો કે આ ખામીઓ માત્ર અત્‍યંત ગંભીર નથી, પરંતુ તેને તાત્‍કાલિક સુધારવાની પણ જરૂર છે.

ડીજીસીએએ તેના ઓડિટમાં એર ઇન્‍ડિયાના ઘણા મહત્‍વપૂર્ણ ક્ષેત્રોમાં ખામીઓ શોધી કાઢી છે. આમાં એરપોર્ટ પર ક્રૂ તાલીમ, તેમના આરામ અને ફરજના કલાકોના નિયમો, ક્રૂની અછત અને યોગ્‍યતાના ધોરણો સંબંધિત ઉલ્લંઘનોનો સમાવેશ થાય છે. આ ઓડિટ ૧ થી ૪ જુલાઈ દરમિયાન ગુરુગ્રામમાં એર ઈન્‍ડિયાના મુખ્‍યાલયમાં હાથ ધરવામાં આવ્‍યું હતું. ઓડિટ દરમિયાન, DGCA એ એરલાઇનની ઓપરેશનલ પ્રક્રિયાઓની સંપૂર્ણ તપાસ કરી હતી, જેમાં ફ્‌લાઇટ શેડ્‍યુલિંગ અને રોસ્‍ટરિંગ (એરલાઇન સ્‍ટાફને ફરજો સોંપવી)નો સમાવેશ થાય છે.

એર ઇન્‍ડિયાએ આ ઓડિટના પરિણામો સ્‍વીકારતા એક નિવેદન જારી કર્યું છે. એરલાઇને કહ્યું છે કે બધી એરલાઇન્‍સની જેમ, અમે પણ અમારી પ્રક્રિયાઓ સુધારવા માટે નિયમિત ઓડિટમાંથી પસાર થઈએ છીએ. જુલાઈમાં હાથ ધરાયેલા આ ઓડિટમાં અમે સંપૂર્ણ પારદર્શિતા જાળવી રાખી. અમે DGCA ને સમયસર જવાબ આપીશું અને જરૂરી તમામ સુધારા કરીશું. એરલાઇને DGCA દ્વારા દર્શાવવામાં આવેલી ખામીઓને શકય તેટલી વહેલી તકે સુધારવાનું વચન આપ્‍યું છે.

ઉલ્લેખનીય છે કે ૧૨ જૂનના રોજ અમદાવાદમાં એર ઈન્‍ડિયાની ફ્‌લાઈટ AI૧૭૧ ક્રેશ થયા બાદ DGCA એ આ કાર્યવાહી કરી છે. અમદાવાદ એરપોર્ટથી લંડન જતી એર ઈન્‍ડિયાની આ ફ્‌લાઈટ ટેકઓફ કર્યાના થોડા સમય પછી જ ક્રેશ થઈ ગઈ હતી. ક્રેશ થયેલ વિમાન બોઇંગ ૭૮૭ ડ્રીમલાઇનર હતું. આ અકસ્‍માતમાં વિમાનમાં સવાર ૨૪૨ મુસાફરોમાંથી ૨૪૧ અને જમીન પર રહેલા ૧૯ લોકોએ જીવ ગુમાવ્‍યા હતા. એરક્રાફ્‌ટ એક્‍સિડન્‍ટ ઇન્‍વેસ્‍ટિગેશન બ્‍યુરો આ ઘટનાની તપાસ કરી રહ્યું છે.

AAIB ના પ્રારંભિક ૧૫ પાનાના અહેવાલમાં ખુલાસો થયો હતો કે વિમાનના બંને એન્‍જિનને ઇંધણ પુરવઠો ટેકઓફ થયાની થોડીક સેકન્‍ડ પછી બંધ થઈ ગયો હતો. તપાસમાં જાણવા મળ્‍યું કે બંને એન્‍જિનના ફયુઅલ સ્‍વીચો RUN થી CUTOFF માં બદલી નાખવામાં આવ્‍યા હતા. આ ઉપરાંત, ૨૩ જુલાઈના રોજ, DGCA એ એર ઈન્‍ડિયાને ચાર કારણ બતાવો નોટિસ જારી કરી હતી. આ નોટિસો કેબિન ક્રૂ આરામ, તાલીમ અને સંચાલન નિયમોના ઉલ્લંઘન સાથે સંબંધિત હતી. અગાઉ ૨૧ જૂનના રોજ DGCA  એ એરલાઇનને ક્રૂ શેડ્‍યુલિંગની જવાબદારીમાંથી તાત્‍કાલિક ત્રણ અધિકારીઓને દૂર કરવાનો આદેશ આપ્‍યો હતો.