લંડન/ગ્લાસગો : 30 જુલાઈ, 2025 – રવિવારે બ્રિટનમાં એક ઇઝીજેટ વિમાનને ઇમરજન્સી લેન્ડિંગ કરવું પડ્યું હતું, જ્યારે એક ભારતીય નાગરિકે ફ્લાઇટમાં બોમ્બ મૂકવાની ધમકી આપી અને "અલ્લાહુ અકબર" ના નારા લગાવ્યા હતા. આ ઘટનાથી મુસાફરો અને ક્રૂમાં ભારે ગભરાટ ફેલાયો હતો. આરોપીની ઓળખ લુટનમાં રહેતા 41 વર્ષીય અભય દેવદાસ નાયક તરીકે થઈ છે.
 
આકાશમાં દહેશત: શું બન્યું તે ફ્લાઇટમાં?
રવિવારે સવારે 7 વાગ્યે લ્યુટનથી ગ્લાસગો જઈ રહેલી ફ્લાઇટમાં આ ઘટના બની. નાયક અચાનક ટોઇલેટમાંથી બહાર આવ્યો અને જોરથી બૂમો પાડવા લાગ્યો, "હું ફ્લાઇટમાં બોમ્બ મૂકીશ! અમેરિકાને મોત! ટ્રમ્પને મોત! અલ્લાહુ અકબર!" તેણે મહિલા એર હોસ્ટેસને ધક્કો માર્યો અને ખૂબ જ આક્રમક વર્તન કર્યું, જેનાથી મુસાફરોમાં ગભરાટ ફેલાઈ ગયો.
 
મુસાફરોની બહાદુરી અને તાત્કાલિક કાર્યવાહી
ફ્લાઇટની 21મી પંક્તિમાં બેઠેલા એક પુરુષ મુસાફરે તરત જ પરિસ્થિતિ પર કાબૂ મેળવ્યો. તેણે નાયકને પકડીને જમીન પર પછાડી દીધો. અન્ય બે પુરુષ મુસાફરોએ પણ તેને પકડી રાખવામાં મદદ કરી. તાત્કાલિક નાયકના ખિસ્સા અને તેની બેગની તપાસ કરવામાં આવી. એક મુસાફરે જણાવ્યું કે નાયક પાસે શરણાર્થી ઓળખપત્ર હતું અને તે ભારતીય નાગરિક હોવાનું જણાય છે. પૂછવામાં આવતા તેણે કહ્યું, "હું ટ્રમ્પને સંદેશ આપવા માંગતો હતો."
 
ઇમરજન્સી લેન્ડિંગ અને ધરપકડ
આ ઘટના બાદ, ફ્લાઇટને ગ્લાસગો એરપોર્ટના એક દૂરના ભાગમાં ઇમરજન્સી લેન્ડિંગ કરાવવામાં આવ્યું, જ્યાં ફાયર બ્રિગેડ અને પોલીસ ટીમો પહેલેથી જ હાજર હતી. નાયકને હાથકડી પહેરાવીને વિમાનમાંથી ઉતારવામાં આવ્યો અને તરત જ તેની ધરપકડ કરવામાં આવી.

સોમવારે તેને પેસલી શેરિફ કોર્ટમાં રજૂ કરવામાં આવ્યો હતો. તેના પર હુમલો અને વિમાનની સલામતીને જોખમમાં મૂકવા જેવી ગંભીર કલમો હેઠળ આરોપ મૂકવામાં આવ્યો છે. આ કેસ સ્કોટલેન્ડમાં ગંભીર ગુનાઓની સુનાવણી માટે અપનાવવામાં આવતી સોલેમન પ્રક્રિયા હેઠળ ચાલી રહ્યો છે. નાયકે કોઈ ગુનો કબૂલ્યો ન હતો અને કોર્ટે તેને કસ્ટડીમાં મોકલી આપ્યો છે. હવે તેની આગામી હાજરી 5 ઓગસ્ટે થશે.

કાઉન્ટર ટેરરિઝમ યુનિટ હવે આ મામલાની તપાસ કરી રહ્યું છે અને સોશિયલ મીડિયા પર વાયરલ થયેલા વિડિયો ફૂટેજનું પણ વિશ્લેષણ કરી રહ્યું છે. એરલાઇને એક નિવેદનમાં જણાવ્યું હતું કે, "અમારા ક્રૂને આવી પરિસ્થિતિઓમાં ઝડપી નિર્ણયો લેવા અને ફ્લાઇટની સલામતી સુનિશ્ચિત કરવા માટે તાલીમ આપવામાં આવી છે. અમે કોઈપણ સંજોગોમાં મુસાફરોની સલામતી સાથે સમાધાન કરતા નથી."