<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 3rd August 2025

જમ્મુ-કાશ્મીરમાં 2000 વર્ષ જૂની મૂર્તિઓ મળી : અનંતનાગના પવિત્ર સ્થળે ખોદકામ દરમિયાન પ્રાચીન અવશેષો બહાર આવ્યા

અનંતનાગના કારકુટ નાગ સ્થળેથી ૧૫ પ્રાચીન મૂર્તિઓ અને ૧૧ શિવલિંગ મળી આવ્યા : અવશેષોનો સંબંધ કારકોટા રાજવંશ સાથે હોવાની શક્યતા : પુરાતત્વ વિભાગ દ્વારા તપાસ શરૂ

અનંતનાગ : જમ્મુ અને કાશ્મીરના અનંતનાગ જિલ્લામાં એક હિન્દુ ધાર્મિક સ્થળના નવીનીકરણના કામ દરમિયાન ખોદકામમાંથી પ્રાચીન મૂર્તિઓ અને અવશેષો મળી આવ્યા છે. આ ઘટનાએ સ્થાનિક સમુદાય અને પુરાતત્વવિદોમાં ઉત્સાહ જગાવ્યો છે. અધિકારીઓ અને સ્થાનિકોના મતે, આ મૂર્તિઓ અને શિવલિંગો ૨૦૦૦ વર્ષથી પણ વધુ જૂના હોઈ શકે છે.
મૂર્તિઓ મળી આવેલું સ્થળ આશમુકમ શહેરના સલિયા વિસ્તારમાં આવેલું છે, જેને કારકુટ નાગ તરીકે ઓળખવામાં આવે છે. કાશ્મીરી પંડિતો આ સ્થળને કારકોટા રાજવંશ સાથે જોડે છે, જેણે ૬૨૫ થી ૮૫૫ CE/BC દરમિયાન કાશ્મીર પર શાસન કર્યું હોવાનું મનાય છે. એક સ્થાનિક સમાચાર ચેનલના અહેવાલ મુજબ, આ સ્થળેથી કુલ ૧૫ પ્રાચીન મૂર્તિઓ, જેમાં ૧૧ શિવલિંગનો સમાવેશ થાય છે, મળી આવ્યા છે.
પીટીઆઈના અહેવાલ મુજબ, યુટીના પબ્લિક વર્ક્સ ડિપાર્ટમેન્ટ દ્વારા ઝરણાના જીર્ણોદ્ધારનું કામ ચાલી રહ્યું હતું, ત્યારે મજૂરોને ખોદકામ દરમિયાન આ વસ્તુઓ મળી હતી. પુરાતત્વ અને સંગ્રહાલય વિભાગના અધિકારીઓએ તરત જ સ્થળની મુલાકાત લીધી હતી. અધિકારીઓએ જણાવ્યું છે કે મૂર્તિઓનું ભૌતિક અને ડેટિંગ પરીક્ષણ કરવા માટે તેમને શ્રીનગર મોકલવામાં આવશે, જેથી તેમની ચોક્કસ ઉંમર અને મૂળ વિશે જાણી શકાય. પરીક્ષણ બાદ આ મૂર્તિઓને શ્રીનગરમાં આવેલા શ્રી પ્રતાપ સિંહ મ્યુઝિયમમાં રાખવામાં આવશે અને સંશોધકો પણ તેના પર અભ્યાસ કરશે.
એક સ્થાનિક કાશ્મીરી પંડિતે જણાવ્યું કે, "એવી સંભાવના છે કે અહીં કોઈ પ્રાચીન મંદિર હોઈ શકે અથવા કોઈએ તેને સંરક્ષણ માટે અહીં રાખ્યા હોય." ત્યાં હાજર સ્થાનિક સમુદાયના નેતાઓએ આ સ્થળના ગૌરવને પુનઃસ્થાપિત કરવા માટે ત્યાં એક મંદિર બનાવવાની જરૂરિયાત પર ભાર મૂક્યો છે.

(2:44 PM IST)