રશિયન અધિકારીઓએ જણાવ્યું હતું કે યુક્રેન દ્વારા રાત્રે કરવામાં આવેલા ડ્રોન હુમલાને કારણે રશિયન બ્લેક સી રિસોર્ટ સોચી નજીક એક તેલ ડેપોમાં ભારે આગ લાગી હતી. બંને દેશો વચ્ચે હુમલા અને વળતા હુમલા ચાલુ છે. ક્રાસ્નોદર પ્રદેશના ગવર્નર વેનિઆમિન કોન્ડ્રેટેવે ટેલિગ્રામ પર જણાવ્યું હતું કે ડ્રોનનો કાટમાળ તેલની ટાંકી સાથે અથડાયો હતો, જેના કારણે આગ લાગી હતી. 120 થી વધુ અગ્નિશામકો આગ ઓલવવાનો પ્રયાસ કરી રહ્યા છે. સોશિયલ મીડિયા પરના વીડિયોમાં તેલ ડેપો ઉપર ભારે ધુમાડો નીકળતો જોવા મળ્યો હતો.

     રશિયાના નાગરિક ઉડ્ડયન સત્તાવાળા, રોસાવિઆત્સિયાએ સોચી એરપોર્ટ પર અસ્થાયી રૂપે ફ્લાઇટ્સ બંધ કરી દીધી હતી. ઉત્તરમાં વોરોનેઝ પ્રદેશના અધિકારીઓએ જણાવ્યું હતું કે બીજા યુક્રેનિયન ડ્રોન હુમલામાં ચાર લોકો ઘાયલ થયા છે.

     રશિયાના સંરક્ષણ મંત્રાલયે જણાવ્યું હતું કે રવિવારે વહેલી સવારે રશિયા અને કાળા સમુદ્ર ઉપર 93 યુક્રેનિયન ડ્રોનને તોડી પાડવામાં આવ્યા હતા.

બીજી તરફ, દક્ષિણ યુક્રેનિયન શહેર માયકોલાઈવમાં રશિયન મિસાઇલ હુમલામાં રહેણાંક વિસ્તારને નિશાન બનાવવામાં આવ્યો હતો, જેમાં સાત લોકો ઘાયલ થયા હતા. 

  યુક્રેનની રાજ્ય કટોકટી સેવાઓ દ્વારા આ માહિતી આપવામાં આવી હતી. યુક્રેનિયન વાયુસેનાએ જણાવ્યું હતું કે રવિવારે રશિયાએ યુક્રેન પર 76 ડ્રોન અને સાત મિસાઇલો છોડ્યા હતા. આમાંથી 60 ડ્રોન અને એક મિસાઇલને અટકાવવામાં આવી હતી, પરંતુ 16 ડ્રોન અને છ મિસાઇલો આઠ સ્થળોએ લક્ષ્યાંકો પર ત્રાટક્યા હતા.

અમેરિકન રાષ્ટ્રપતિ ડોનાલ્ડ ટ્રમ્પે મંગળવારે રશિયાના રાષ્ટ્રપતિ વ્લાદિમીર પુતિનને શાંતિ પ્રયાસો માટે 8 ઓગસ્ટની સમયમર્યાદા આપી હતી. ટ્રમ્પે ગુરુવારે કહ્યું હતું કે યુક્રેન સાથેના યુદ્ધમાં યુદ્ધવિરામ માટે મોસ્કોને સંમત કરાવવા માટે ખાસ દૂત સ્ટીવ વિટકોફ રશિયા જઈ રહ્યા છે. તેમણે જો કોઈ પ્રગતિ નહીં થાય તો નવા આર્થિક પ્રતિબંધોની ધમકી પણ આપી હતી.