નવી દિલ્‍હી,તા.૦૪: નેશનલ ફાર્માસ્‍યુટિકલ પ્રાઈસિગ ઓથોરિટી (એનપીપીએ)એ દર્દીઓને આવશ્‍યક દવાઓ પોષણક્ષણ ભાવે મળી રહે તે હેતુથી પેરાસીટામોલ, હ્રદયરોગ, બળતરા સહિતની ૩૫ દવાઓની કિમતોમાં ૧૦-૧૫ ટકાનો ઘટાડો કર્યો હોવાનું જણાવ્‍યું છે. પેરાસીટામોલ, એટોરવાસ્‍ટેટિન, એમોક્‍સિસિલિન સહિતની દવાઓનું વેચાણ અગ્રણી ફાર્મા કંપનીઓ કરે છે જેનો હ્રદય, ડાયાબિટિસ અને ઈન્‍ફેક્‍શનના દર્દીઓમાં વ્‍યાપક ઉપયોગ જોવા મળે છે. આ દવાઓના રિટેલ ભાવમાં એનપીપીએ દ્વારા ઘટાડો કરાયો છે. આ સાથે જ એન્‍ટિબાયોટિક તથા મનોરોગ માટેની દવાઓ પણ હવે સસ્‍તી થશે. કેમિકલ્‍સ એન્‍ડ ફર્ટિલાઈઝર્સ મંત્રાલયે એનપીપીએના ભાવ નિયંત્રણના આધારે એક પરિપત્ર જાહેર કર્યો હતો. આવશ્‍યક દવાઓની કિમતોમાં ઘટાડો થતા ગંભીર બીમારી ધરાવતા લોકોને આંશિક રાહત મળશે. 

એનપીપીએએ સ્‍પષ્ટતા કરતા જણાવ્‍યું હતું કે, આ દવાઓના ભાવ ગુડ્‍ઝ એન્‍ડ સર્વિસ ટેક્‍સ (જીએસટી) સિવાય નક્કી કરાયા છે. જો લાગું થતું હોય તો જીએસટી ઉમેરી શકાશે.

એકુમ્‍સ ડ્રગ્‍સ એન્‍ડ ફાર્માસ્‍યુટિકલ્‍સ દ્વારા તૈયાર કરાતી અને ડો. રેડ્ડીસ લેબ દ્વારા વેચાણ થઈ રહેલી એક એસેક્‍લોફેનાક-પેરાસીટામોલ-ટ્રિપ્‍સિન કાયમોટ્રિપ્‍સિન ટેબલેટની કિમત હવે ~૧૩ નક્કી કરવામાં આવી છે. જ્‍યારે કેડિલા ફાર્માસ્‍યુટિકલ્‍સ દ્વારા સમાન સંયોજન સાથે તૈયાર કરાતી આ જ ટેબ્‍લેટની કિમત હવે ~૧૫.૦૧ રહેશે. હ્રદયરોગના દર્દીઓમાં બહોળો વપરાશ ધરાવતી એટ્રોવાસટેટિન ૪૦ એમજી અને ક્‍લોપિડોગરેલ ૭૫ એમજી દવાની કિમત ~૨૫.૬૧ રહેશે. બાળકો માટે સેફિક્‍સાઈમ અને પેરાસીટામોલના સંયોજનની દવાઓના ભાવ પણ ઘટાડાયા છે. એનપીપીએ ગંભીર સારવારમાં મદદરૂપ વિટામિન ડીના ટીપાં (કોલેકેલ્‍સિફેરોલ), ડાયક્‍લોફેનાક ઈન્‍જેક્‍શનના ભાવ ઘટાડીને ~૩૧.૭૭ પ્રતિ એમએલ કર્યા હોવાનું જણાવ્‍યું હતું. રિટેલર તથા ડીલર્સે નવું ભાવપત્રક દર્શાવવું પડશે તેમ મંત્રાલયે આદેશમાં જણાવ્‍યું હતું. નિયત કરેલી કિમતોનો અમલ કરવામાં નિષ્‍ફળ જવા બદલ ડીપીસીઓ, ૨૦૧૩ અંતર્ગત કાયદાકીય કાર્યવાહી થઈ શકે છે. દવા ઉત્‍પાદકઓએ તમામ કાયદાકિય જરૂરિયાતોનું પાલન કરવાનું રહેશે તથા ઈન્‍ટિગ્રેટેડ ફાર્માસ્‍યુટિકલ ડેટાબેઝ મેનેજમેન્‍ટ સિસ્‍ટમ મારફતે સુધારેલું ભાવપત્રક ફોર્મ પાંચમાં ભરીને વિગતો સાથે એનપીપીએ તથા રાજ્‍યના ડ્રગ કંટ્રોલરોને સોંપવાનું રહેશે.

રસાયણો અને ખાતર મંત્રાલય હેઠળ કાર્ય કરતી એનપીપીએ ભારતમાં દવાના ભાવ નિયમનકાર છે. તે ફાર્માસ્‍યુટિકલ ઉત્‍પાદનોના ભાવ નક્કી કરવા, સુધારવા, નિયંત્રિત તેમજ નિયંત્રણમુક્‍ત બંને દવાઓના ભાવનું નિરીક્ષણ કરવા માટે જવાબદાર છે.

ભાવ નિયંત્રણ આદેશમાં આવરી લેવાયેલી મુખ્‍ય ફોર્મ્‍યુલેશનમાં એસેક્‍લોફેનાક, પેરાસીટામોલ, ટ્રિપ્‍સિન કાયમોટ્રિપ્‍સિન, એમોક્‍સિસિલિન અને પોટેશિયમ ક્‍લેવુલેનેટ, એટોર્વાસ્‍ટેટિન સંયોજન તથા નવા ઓરલ એન્‍ટિ ડાયાબિટિક સંયોજન જેમ કે એમ્‍પાગ્‍લિફલોઝિન, સિટાગ્‍લિપ્‍ટિન અને મેટફોર્મિનનો સમાવેશ થાય છે