ભારતીય રેલવે વિશ્વનું ચોથું સૌથી મોટું રેલવે નેટવર્ક છે. દરરોજ હજારો ટ્રેનો લાખો લોકોને તેમની મંઝિલ સુધી પહોંચાડે છે. ટ્રેનમાં મુસાફરી કરવા માટે આપણે હંમેશા ટિકિટ પર સ્ટેશનનું નામ લખાવીએ છીએ. પરંતુ ભારતમાં એક એવું રેલવે સ્ટેશન પણ છે, જેનું કોઈ નામ નથી, છતાં ત્યાં ટ્રેનોની અવરજવર ચાલુ છે.
 
નામ વગરનું અનોખું રેલવે સ્ટેશન
પશ્ચિમ બંગાળના બર્ધમાન શહેરથી લગભગ 35 કિલોમીટર દૂર એક એવું રેલવે સ્ટેશન છે, જેનું કોઈ નામ નથી. આ સ્ટેશન છેલ્લા 17 વર્ષથી નામ વગર જ ચાલી રહ્યું છે. અહીં ટિકિટ કાઉન્ટર પણ છે, ટ્રેનો પણ ઉભી રહે છે અને મુસાફરો પણ નિયમિતપણે મુસાફરી કરે છે. પરંતુ સ્ટેશન પર લાગેલા સાઈનબોર્ડ પર કોઈ નામ લખેલું નથી.
 
શા માટે આ સ્ટેશનનું નામ નથી?
આ અનોખી પરિસ્થિતિ પાછળ બે ગામો વચ્ચેનો વિવાદ જવાબદાર છે. જ્યારે ભારતીય રેલવેએ આ સ્ટેશન બનાવ્યું ત્યારે તેનું નામ 'રૈનાગર' રાખવામાં આવ્યું હતું. પરંતુ સ્થાનિક લોકોએ તેનું નામ બદલીને 'જાતિયા' કરવાની માંગ કરી. આ મામલો એટલો ગરમાયો કે તે કોર્ટ સુધી પહોંચી ગયો. આખરે, જ્યાં સુધી વિવાદનો ઉકેલ ન આવે ત્યાં સુધી રેલવેએ સ્ટેશન પરથી નામ હટાવી દીધું. ત્યારથી આ સ્ટેશન 'નામ વગરના રેલવે સ્ટેશન' તરીકે ઓળખાય છે.
 
રવિવારે બંધ રહે છે સ્ટેશન
આ સ્ટેશન પર ફક્ત 'બાંકુડા-મસાગ્રામ પેસેન્જર ટ્રેન' જ ઉભી રહે છે, જે અઠવાડિયામાં છ દિવસ ચાલે છે. રવિવારે અહીં કોઈ ટ્રેન આવતી નથી, કારણ કે રવિવારે સ્ટેશન માસ્ટરને ટિકિટ ખરીદવા માટે બર્ધમાન શહેર જવું પડે છે, તેથી રવિવારે સ્ટેશન બંધ રહે છે. રસપ્રદ વાત એ છે કે, આ સ્ટેશન માટે વેચાતી ટિકિટો પર આજે પણ જૂનું નામ 'રૈનાગર' જ છાપવામાં આવે છે.

આ રેલવે સ્ટેશન ભારતીય રેલવેના ઇતિહાસમાં એક અનોખી અને રસપ્રદ ઘટના છે.