ઓવલ ખાતે ઇંગ્લેન્ડ સામે રમાયેલી પાંચમી અને અંતિમ ટેસ્ટ મેચમાં ભારતે 6 રનથી રોમાંચક જીત મેળવી. આ જીતનો મુખ્ય શ્રેય ઝડપી બોલર મોહમ્મદ સિરાજને જાય છે, જેણે પાંચ વિકેટો ઝડપીને ભારતની જીતમાં મહત્વની ભૂમિકા ભજવી. સિરાજ ઉપરાંત, પ્રસિદ્ધ કૃષ્ણાએ ચાર અને આકાશદીપે એક વિકેટ લીધી. આ વિજય સાથે ભારતે પાંચ મેચની ટેસ્ટ શ્રેણી 2-2 થી બરાબર કરી લીધી.
 
સિરાજ મેચનો હીરો બન્યો
ઇંગ્લેન્ડને જીતવા માટે 374 રનનો લક્ષ્યાંક મળ્યો હતો, પરંતુ તેમની ટીમ 367 રનમાં ઓલઆઉટ થઈ ગઈ. રનની દ્રષ્ટિએ આ ભારતની ટેસ્ટ મેચમાં સૌથી નાની જીત છે, જે ક્રિકેટના ઇતિહાસમાં એક યાદગાર જીત તરીકે નોંધાઈ ગઈ છે. મેચમાં શાનદાર પ્રદર્શન કરનાર અને પાંચ વિકેટ લેનાર મોહમ્મદ સિરાજને 'મેન ઓફ ધ મેચ' તરીકે પસંદ કરવામાં આવ્યો.

હૈદરાબાદના AIMIM સાંસદ અસદુદ્દીન ઓવૈસીએ સિરાજના પ્રદર્શનથી ખુશ થઈને તેને એક ખાસ અંદાજમાં અભિનંદન આપ્યા છે. તેમણે ઇન્સ્ટાગ્રામ પર એક પોસ્ટમાં લખ્યું, “મોહમ્મદ સિરાજ, હંમેશા વિજેતા, જેમ કે આપણે હૈદરાબાદીમાં કહીએ છીએ - ‘પૂરા ખોલ દિયે પાશા!’” ઓવૈસીએ આ પોસ્ટ સાથે સિરાજનો એક વીડિયો પણ શેર કર્યો, જેમાં તે વિકેટ લીધા પછી ઉજવણી કરતો જોવા મળે છે.
 
સિરાજે જીત પછી શું કહ્યું?
આ શાનદાર જીત પછી સિરાજે કહ્યું કે, "મેચના દિવસે સવારે મેં મારા ફોનનું વોલપેપર 'બિલીવ'નું રાખ્યું હતું અને નક્કી કર્યું હતું કે હું દેશ માટે આ કરીશ. મને હંમેશા વિશ્વાસ હતો કે હું કોઈપણ પરિસ્થિતિમાં મેચ જીતી શકું છું." સિરાજની આ માન્યતા આખરે સાચી સાબિત થઈ. જસપ્રીત બુમરાહની ગેરહાજરીમાં સિરાજે આખી શ્રેણીમાં મહત્વની જવાબદારી સંભાળી અને પોતાની ક્ષમતાથી તેને સારી રીતે નિભાવી.

આ મેચમાં ઇંગ્લેન્ડને જીતવા માટે 17 રનની જરૂર હતી ત્યારે ઘાયલ ક્રિસ વોક્સ એક હાથે બેટિંગ કરવા આવ્યો હતો, પરંતુ તેને એક પણ બોલ રમવાની તક ન મળી અને તે નોન-સ્ટ્રાઈકર એન્ડ પર જ ઊભો રહ્યો. વોક્સ અને એટકિન્સને 10 રન ઉમેર્યા, પણ તે જીત માટે પૂરતા ન હતા. મેચની છેલ્લી વિકેટ પણ સિરાજે જ લીધી અને ભારતીય ટીમને યાદગાર જીત અપાવી.