રોહતક તા.૫ : રોહતકની સુનારિયા જેલમાં બંધ બાબા રામ રહીમ ૪૦ દિવસના પેરોલ પર બહાર આવ્‍યા છે. મંગળવારે સવારે ૭ વાગ્‍યે હનીપ્રીત, સિરસા ડેરાના ચેરમેન દાન સિહ, ડો. આર.કે. નૈન અને શરણદીપ સિહ સીટુ બે વાહનો સાથે રોહતક પહોંચ્‍યો અને રામ રહીમ સાથે સિરસા ડેરા જવા રવાના થયા.

કેદી રામ રહીમનો જન્‍મદિવસ ૧૫ ઓગસ્‍ટે છે. એવું કહેવામાં આવી રહ્યું છે કે સિરસા ડેરામાં રક્ષાબંધન પછી જન્‍મદિવસ ઉજવવામાં આવશે. સાધ્‍વી જાતીય સતામણી કેસમાં દોષિત સાબિત થયા બાદ રામ રહીમ ૨૦૧૭ થી રોહતકની સુનારિયા જેલમાં સજા કાપી રહ્યો છે.

રામ રહીમનું જેલમાંથી બહાર જવું એ કોઈ નવી વાત નથી. હરિયાણા, પંજાબ, રાજસ્‍થાન અને દિલ્‍હીમાં ચૂંટણીઓ દરમિયાન તેમને પેરોલ અને ફર્લો મળી રહ્યા છે. છેલ્‍લી વખત તેઓ ૧૦ એપ્રિલે ૨૧ દિવસની ફર્લો પર જેલમાંથી બહાર આવ્‍યા હતા. જે સિરસા ડેરામાં જ વિતાવી હતી.

જેલમાં ચોક્કસ સમય વિતાવ્‍યા પછી અને યોગ્‍ય વર્તન કર્યા પછી, કોર્ટમાં પેરોલ અને ફર્લોની પ્રક્રિયા શરૂ થાય છે. જોકે, સજામાં પેરોલનો સમયગાળો ઉમેરવામાં આવતો નથી, જ્‍યારે સજામાં જ ફર્લોનો સમયગાળો ઉમેરવામાં આવે છે. રામ રહીમ ૨૦૨૫માં ત્રીજી વખત જેલમાંથી બહાર આવ્‍યા છે. તેમને ફેબ્રુઆરી અને એપ્રિલમાં ૨૧ દિવસની ફર્લો મળી છે. ઉપરાંત, ૨૦૧૭થી તેમને ૧૪મી વખત પેરોલ અથવા ફર્લો મળી છે.(૩૮.૭)