તા. ૨૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૩ રવિવાર
News of Saturday, 9th August 2025
વૃદ્ધાવસ્થામાં ઓનલાઈન રોમાંસ પડયો મોંઘોઃ લવ ટ્રેપમાં થઈ ૯ કરોડની છેતરપિંડી!
મુંબઈમાં એક ચોંકાવનારી ઘટનાઃ છેતરપિંડી કરનારાઓએ ૮૦ વર્ષના એક વૃદ્ધને પ્રેમ જાળમાં ફસાવીને રૂપિયા પડાવી લીધા

મુંબઈ,તા.૦૯: મુંબઈમાં એક ચોંકાવનારી ઘટના પ્રકાશમાં આવી છે જ્યાં છેતરપિડી કરનારાઓએ ૮૦ વર્ષના એક વૃદ્ધને પ્રેમ જાળમાં ફસાવીને તેમની પાસેથી ૯ કરોડ રૂપિયા પડાવી લીધા. ૨૧ મહિના સુધી સાયબર ઠગના ‘ઓનલાઈન પ્રેમ' જાળમાં ફસાયેલા વૃદ્ધે લગભગ ૯ કરોડ રૂપિયા ગુમાવ્યા અને જ્યારે તેને સત્ય ખબર પડી ત્યારે તેની તબિયત બગડી ગઈ. પીડિતે ચાર મહિલાઓના નામ આપ્યા છે. જો કે, પોલીસ હવે તપાસ કરી રહી છે કે જે ચાર મહિલાઓના નામ સામે આવ્યા છે તેમના નામ અલગ છે કે એક જ વ્યક્તિએ અનેક નંબરોથી વાત કરી હતી.
આ કેસ એપ્રિલ ૨૦૨૩ માં શરૂ થયો હતો, જ્યારે મધ્ય મુંબઈમાં રહેતા એક વૃદ્ધ પુરુષે ફેસબુક પર શર્વી નામની મહિલાને ફ્રેન્ડ રિક્વેસ્ટ મોકલી હતી. શરૂઆતમાં શર્વીએ તેને નહોતી કરી, પરંતુ થોડા દિવસો પછી તેણે પોતે જ રિક્વેસ્ટ મોકલી અને વાતચીત શરૂ થઈ. બંનેએ વોટ્સએપ નંબર પણ એક્સચેન્જ કર્યા. શર્વીએ જણાવ્યું કે તે તેના પતિથી અલગ રહેતી હતી અને તેના બાળકો બીમાર હતા. આ બહાને, તેણે પૈસા માગ્યા અને વૃદ્ધ પુરુષે મદદ કરી
થોડા સમય પછી, કવિતા નામની બીજી એક મહિલાએ વોટ્સએપ પર સંપર્ક કર્યો, પોતાને શર્વીના પરિચિત તરીકે ઓળખાવી અને વૃદ્ધ માણસ સાથેની મિત્રતા વિશે વાત કરી. તેણે વૃદ્ધ માણસને અશ્લીલ સંદેશાઓ પણ મોકલ્યા અને એક યા બીજા બહાને પૈસા પડાવ્યા.
ડિસેમ્બર ૨૦૨૩માં, પીડિતને દિનાઝ નામની એક મહિલાનો આંતરરાષ્ટ્રીય નંબર પરથી સંદેશ મળ્યો. તેણે પોતાને શાર્વીની બહેન તરીકે ઓળખાવી અને કહ્યું કે શાર્વીનું મૃત્યુ થયું છે. દિનાઝે પૈસા માગ્યા અને કહ્યું કે તે હોસ્પિટલના બિલ ચૂકવશે. થોડા દિવસો પછી, તેણે પોતાનો પ્રેમ વ્યક્ત કર્યો અને લગ્ન કરવાની ઇચ્છા પણ વ્યક્ત કરી.
આ પછી, જાસ્મીન નામની એક મહિલાએ સંપર્ક કર્યો, પોતાને દિનાઝની મિત્ર તરીકે ઓળખાવી અને વૃદ્ધને સમજાવ્યું કે દિનાઝ તેના પૈસા પાછા આપવા માગે છે. તેણે પણ પૈસા માગ્યા અને વૃદ્ધે તેને આપ્યા. જ્યારે પૈસા ખતમ થઈ ગયા, ત્યારે વૃદ્ધે તેના પુત્ર પાસે ૫ લાખ રૂપિયા માગ્યા. જ્યારે પુત્રએ કારણ પૂછ્યું, ત્યારે આખી વાર્તા બહાર આવી અને તેને ખ્યાલ આવ્યો કે તેના પિતા સાથે છેતરપિડી થઈ છે.
જ્યારે વૃદ્ધને આ વાતની ખબર પડી, ત્યારે તે ખૂબ જ આઘાતમાં મુકાઈ ગયો અને તેની તબિયત બગડી ગઈ અને તેને હોસ્પિટલમાં દાખલ કરવો પડ્યો. પોલીસે કેસ નોંધીને તપાસ શરૂ કરી છે. શરૂઆતની તપાસમાં શંકા છે કે આ છેતરપિડી ખૂબ જ સુવ્યવસ્થિત રીતે કરવામાં આવી છે.(૪૦.૪)
(10:23 AM IST)









છેલ્લા 8 દિવસમાં સૌથી લોકપ્રિય 
