<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 11th August 2025

બચત ખાતાના નિયમો RBIની હદ બહાર! મિનિમમ બેલેન્સ નક્કી કરવા બેંકો સ્વતંત્ર: ગવર્નર સંજય મલ્હોત્રા

એક તરફ ખાનગી બેંકો વધુ સખત નિયમો લાવી રહી છે, તો બીજી તરફ સરકારી બેંકો હજુ પણ સામાન્ય માણસ માટે સરળ વિકલ્પો પૂરા પાડી રહી છે.

બેંગલુરુ : ભારતીય રિઝર્વ બેંક (RBI)ના ગવર્નર સંજય મલ્હોત્રાએ એક સ્પષ્ટતા કરીને બેંકોને મોટી છૂટ આપી છે. તેમણે જણાવ્યું છે કે બચત ખાતામાં લઘુત્તમ બેલેન્સ (minimum balance) કેટલું રાખવું તે નક્કી કરવાનો અધિકાર બેંકોનો પોતાનો છે, અને તે RBIના નિયમનકારી ક્ષેત્રમાં આવતું નથી.

આ નિવેદન ગુજરાતના મહેસાણા જિલ્લામાં એક કાર્યક્રમ દરમિયાન ગવર્નર દ્વારા મીડિયાને આપવામાં આવ્યું હતું. તાજેતરમાં ICICI બેંકે નવા બચત ખાતા માટે લઘુત્તમ બેલેન્સની મર્યાદા પાંચ ગણી વધારીને ₹10,000 થી ₹50,000 કરી દીધી હતી, જેના પર સવાલો ઉઠી રહ્યા હતા.

ગવર્નર મલ્હોત્રાએ કહ્યું કે, "RBIએ આ નિર્ણય બેંકો પર છોડી દીધો છે. કેટલીક બેંકોએ ₹10,000, તો કેટલીકએ ₹2,000 રાખ્યા છે, અને કેટલીક તો બિલકુલ છૂટ આપે છે. આ RBIની રેગ્યુલેટરી હદમાં નથી."

આનો સીધો અર્થ એ છે કે, જો તમારી ખાનગી બેંક લઘુત્તમ બેલેન્સની રકમમાં વધારો કરે, તો તમારે તે નિયમોનું પાલન કરવું પડશે અથવા બીજી બેંકમાં ખાતું ખોલાવવું પડશે. જોકે, રાહતની વાત એ છે કે સ્ટેટ બેંક ઓફ ઇન્ડિયા (SBI) જેવી ઘણી સરકારી બેંકોએ મિનિમમ બેલેન્સ ન જાળવવા પર કોઈ દંડ લેવાનો ઇનકાર કર્યો છે. આ ખાસ કરીને જન ધન ખાતાઓને લાગુ પડે છે, જે આવી કોઈ શરતોથી મુક્ત છે.

આ નિર્ણય બેંક ગ્રાહકો માટે બે ભાગલા પાડી રહ્યો છે - એક તરફ ખાનગી બેંકો વધુ સખત નિયમો લાવી રહી છે, તો બીજી તરફ સરકારી બેંકો હજુ પણ સામાન્ય માણસ માટે સરળ વિકલ્પો પૂરા પાડી રહી છે.

(6:01 PM IST)