અમદાવાદ તા.૧૨: ગુજરાત હાઈકોર્ટે મુસ્‍લિમો માટે છૂટાછેડા અંગે એક મહત્‍વપૂર્ણ નિર્ણય આપ્‍યો છે. હાઈકોર્ટે કહ્યું છે કે મુસ્‍લિમ લગ્ન ‘‘મુબારત'' એટલે કે પરસ્‍પર સંમતિથી છૂટાછેડા દ્વારા સમાપ્ત કરી શકાય છે અને આ માટે કોઈ લેખિત સંમતિ જરૂરી નથી.

ધ ટાઈમ્‍સ ઓફ ઈન્‍ડિયાના અહેવાલ મુજબ, ન્‍યાયાધીશ એ.વાય. કોગજે અને ન્‍યાયાધીશ એન.એસ. સંજય ગૌડાની ડિવિઝન બેન્‍ચે છૂટાછેડાની પ્રક્રિયા અંગે કુરાન અને હદીસનો ઉલ્લેખ કરીને, રાજકોટ ફેમિલી કોર્ટના આદેશને રદ કર્યો હતો, જેણે મુસ્‍લિમ દંપતી દ્વારા મુબારત દ્વારા છૂટાછેડા માંગતા દાખલ કરેલા દાવાને ફગાવી દીધો હતો.

ફેમિલી કોર્ટે એવું ઠરાવ્‍યું હતું કે ફેમિલી કોર્ટ એક્‍ટની કલમ ૭ હેઠળ આ કેસ ચલાવવા યોગ્‍ય નથી કારણ કે પરસ્‍પર સંમતિથી છૂટાછેડા માટે કોઈ લેખિત કરાર નહોતો. વૈવાહિક મતભેદને કારણે દંપતીએ અલગ થવાનો નિર્ણય લીધો હતો.

હાઈકોર્ટે ફેમિલી કોર્ટના નિર્ણયમાં પણ ખામી શોધી કાઢી હતી કે છૂટાછેડા માટે લેખિત કરાર જરૂરી છે કારણ કે તે કુરાન, હદીસ અથવા મુસ્‍લિમોમાં અંગત કાયદા હેઠળ અનુસરવામાં આવતા રિવાજ સાથે મેળ ખાતો નથી.(૩૮.૩)