મુંબઈ,તા.૧૨: મુંબઈમાં દહીં હાંડી માટે જોરદાર તૈયારીઓ શરૂ થઈ ગઈ છે, જોકે શહેરમાં આ ઉજવણી થાય તે પહેલા જ એક અત્‍યંત દુઃખદ બની છે. બહુપ્રતિક્ષિત દહીં હાંડી ઉત્‍સવના થોડા દિવસો પહેલા જ એક ૧૧ વર્ષના બાળકે રવિવારે રાત્રે દહીંસરમાં પ્રેક્‍ટિસ દરમિયાન પોતાનો જીવ ગુમાવ્‍યો છે. મીડિયા અહેવાલ મુજબ, આ ઘટના રાત્રે ૧૧ વાગ્‍યે દહીંસરનાં કેતકીપાડા વિસ્‍તારમાં બની હતી, જ્‍યાં નવતરુણ ગોવિદા ટીમ તેમના માનવ પિરામિડનું રિહર્સલ કરી રહી હતી. પોલીસના જણાવ્‍યા અનુસાર, મહેશ રમેશ જાધવ તરીકે ઓળખાતો છોકરો પિરામિડના ટોચના સ્‍તર પર ચઢી ગયો હતો ત્‍યારે તે સંતુલન ગુમાવી બેઠો અને સીધો જમીન પર પડી ગયો. તેને ગંભીર ઈજાઓ થઈ અને તેનું ઘટનાસ્‍થળે જ મૃત્‍યુ થયું.

અહેવાલ મળતાં જ દહીંસર પોલીસ ઘટનાસ્‍થળે પહોંચી, સ્‍થળ નિરીક્ષણ કર્યું અને મૃતદેહને પોસ્‍ટમોર્ટમ માટે મોકલી આપ્‍યો. અકસ્‍માત મૃત્‍યુનો અહેવાલ નોંધવામાં આવ્‍યો છે અને બેદરકારી સામેલ છે કે કેમ તે નક્કી કરવા માટે તપાસ ચાલી રહી છે.