નવી દિલ્હી: અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ભારત પર 50% ટેરિફ લાદવાની ધમકીઓ વચ્ચે, ભારતે પોતાના આર્થિક અને રાજદ્વારી સંબંધોને વધુ મજબૂત કરવા માટે એક મોટું પગલું ભર્યું છે. ભારત અને સિંગાપોર વચ્ચે આ અઠવાડિયે ટેકનોલોજી, ઊર્જા, કનેક્ટિવિટી અને કૌશલ્ય વિકાસ જેવા ક્ષેત્રોમાં 10 જેટલા મહત્વના કરારો પર હસ્તાક્ષર થવા જઈ રહ્યા છે

આ કરારોમાં • સૌર ઊર્જા માટે સમુદ્રી કેબલ: આ સમજૂતીઓનો સૌથી મહત્વાકાંક્ષી પ્રસ્તાવ ભારતથી સિંગાપોર સુધી સૌર ઊર્જા પહોંચાડવા માટે સમુદ્રની અંદર કેબલ નાખવાનો છે. આ કેબલ ડેટા કનેક્ટિવિટી પણ પૂરી પાડશે, જે બંને દેશો વચ્ચેના સંબંધોને નવી ઊંચાઈ પર લઈ જશે.
• ગ્રીન એનર્જી: કરારોમાં ભારતથી સિંગાપોરમાં ગ્રીન એમોનિયા અને ગ્રીન હાઇડ્રોજનની નિકાસ કરવાનો પણ પ્રસ્તાવ છે, જે સ્વચ્છ ઊર્જા તરફ બંને દેશોના સહિયારા પ્રયાસો દર્શાવે છે.
• કૌશલ્ય વિકાસ: બંને દેશો ઉડ્ડયન, સેમિકન્ડક્ટર અને અદ્યતન ઉત્પાદન જેવા ક્ષેત્રોમાં વાર્ષિક 1 લાખ ભારતીયોને કૌશલ્ય વિકાસની તાલીમ આપવા પર પણ ચર્ચા કરી રહ્યા છે.
• ડિજિટલાઈઝેશન અને રોકાણ: આ કરારો ટેકનોલોજી અને ડિજિટલાઈઝેશનના ક્ષેત્રમાં સહયોગ વધારવા તેમજ ભારતમાં સિંગાપોરની કંપનીઓ દ્વારા રોકાણ વધારવા પર પણ કેન્દ્રિત છે.
આ તમામ કરારોને આ અઠવાડિયે નવી દિલ્હીમાં યોજાનારી ઇન્ડિયા-સિંગાપોર મિનિસ્ટરિયલ રાઉન્ડટેબલ (ISMR) ની ત્રીજી બેઠકમાં અંતિમ સ્વરૂપ આપવામાં આવશે. આ બેઠકમાં ભારતના વિદેશ મંત્રી એસ. જયશંકર, નાણાં મંત્રી નિર્મલા સીતારમણ, વાણિજ્ય મંત્રી પીયૂષ ગોયલ અને ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રી અશ્વિની વૈષ્ણવ સિંગાપોરના 6 મંત્રીઓને મળશે. આ બેઠક સિંગાપોરના વડાપ્રધાન લોરેન્સ વોંગની ભારતની આગામી મુલાકાત માટે પણ તૈયારીઓ કરશે.
સિંગાપોર ભારતનો આસિયાન દેશોમાં સૌથી મોટો વેપારી ભાગીદાર છે અને વિદેશી સીધા રોકાણ (FDI)નો મુખ્ય સ્ત્રોત પણ છે. આ કરારોથી બંને દેશોના સંબંધો વધુ મજબૂત બનશે અને વૈશ્વિક રાજકારણમાં ભારતની સ્થિતિ વધુ દૃઢ થશે