નવી દિલ્હી:  પાકિસ્તાની આર્મી ચીફ ફિલ્ડ માર્શલ આસિમ મુનીર દ્વારા અમેરિકાના પ્રવાસ દરમિયાન પરમાણુ હુમલાની ધમકી આપવા બદલ ભારતે કડક પ્રતિક્રિયા આપી છે. વિદેશ મંત્રાલયે સ્પષ્ટપણે જણાવ્યું છે કે ભારત આવી પરમાણુ બ્લેકમેલ સામે ઝૂકશે નહીં અને તેની રાષ્ટ્રીય સુરક્ષા માટે તમામ જરૂરી પગલાં લેવાનું ચાલુ રાખશે.

વિદેશ મંત્રાલયના પ્રવક્તા રણધીર જયસ્વાલે જણાવ્યું કે, "પરમાણુ શસ્ત્રોની ધમકી આપવી એ પાકિસ્તાનની જૂની આદત છે. આવી ટિપ્પણીઓ પાછળ રહેલું બેજવાબદાર વલણ આંતરરાષ્ટ્રીય સમુદાયને વિચારવા મજબૂર કરે છે."

 તેમણે કહ્યું કે, "આ નિવેદન એવા દેશની પરમાણુ કમાન્ડ અને કંટ્રોલની સુરક્ષા પર ગંભીર શંકાઓ ઊભી કરે છે, જ્યાં સેના આતંકવાદી જૂથો સાથે સંકળાયેલી છે."

 જયસ્વાલે એ પણ દુઃખ વ્યક્ત કર્યું કે આ ટિપ્પણીઓ પાકિસ્તાનના 'મિત્ર દેશ' ગણાતા અમેરિકાની ધરતી પરથી કરવામાં આવી હતી.

મીડિયા અહેવાલો મુજબ, આસિમ મુનીરે ફ્લોરિડાના ટામ્પામાં પાકિસ્તાની પ્રવાસીઓને સંબોધતા કહ્યું હતું કે, "જો આપણે વિચારીએ કે આપણે નીચે જઈ રહ્યા છીએ, તો આપણે અડધી દુનિયાને પણ નીચે લઈ જઈશું." તેમણે ભારત સાથે સંભવિત યુદ્ધમાં પાકિસ્તાનના અસ્તિત્વ પર ખતરો હોવાની વાત કરીને પરમાણુ હુમલાની પરોક્ષ ધમકી આપી હતી.

મુનીરે ભારત દ્વારા પાણીનો પ્રવાહ રોકવામાં આવે તો ભારતના માળખાકીય સુવિધાઓનો નાશ કરવાની પણ ધમકી આપી હતી. આસિમ મુનીરની બે મહિનામાં આ બીજી અમેરિકા મુલાકાત છે. સત્તાવાર સૂત્રોનું કહેવું છે કે આ પ્રકારના આક્રમક નિવેદનો પાકિસ્તાની સેનાના એક વલણનો ભાગ છે, જે દેશમાં લોકશાહીના અભાવને દર્શાવે છે.