નવી દિલ્હી :સુપ્રીમ કોર્ટે દિલ્હી-એનસીઆરમાંથી તમામ રખડતા કૂતરાઓને 8 અઠવાડિયાની અંદર આશ્રયસ્થાનોમાં ખસેડવાનો આદેશ આપ્યા બાદ બોલીવુડ અભિનેતા અને પ્રાણી પ્રેમી જ્હોન અબ્રાહમએ આ મામલે હસ્તક્ષેપ કર્યો છે. તેમણે ભારતના મુખ્ય ન્યાયાધીશ બી.આર. ગવઈને એક પત્ર લખીને આ આદેશને ગેરકાનૂની, અવ્યવહારુ અને અમાનવીય ગણાવી તેની સમીક્ષા કરવાની વિનંતી કરી છે.
 
જ્હોન અબ્રાહમના પત્રની મુખ્ય વાતો
•    જ્હોને તેમના પત્રમાં જણાવ્યું કે આ કૂતરાઓ 'રખડતા' નહીં, પરંતુ 'સમુદાયના કૂતરા' છે, જે પેઢીઓથી દિલ્હીના લોકો સાથે સહઅસ્તિત્વમાં જીવી રહ્યા છે.
•    તેણે ધ્યાન દોર્યું કે આ આદેશ એનિમલ બર્થ કંટ્રોલ (ABC) ડોગ રૂલ્સ, 2023 અને અગાઉના સુપ્રીમ કોર્ટના ચુકાદાઓનું ઉલ્લંઘન કરે છે. ABC નિયમો મુજબ કૂતરાઓને સ્થળાંતરિત કરવાને બદલે તેમની નસબંધી, રસીકરણ કરીને તેમને તેમના જ વિસ્તારમાં પાછા મૂકવા જોઈએ.
•    જ્હોન અબ્રાહમે ચેતવણી આપી કે જો દિલ્હીના અંદાજિત 10 લાખ કૂતરાઓને સ્થળાંતરિત કરવામાં આવશે, તો તે જગ્યાએ અજાણ્યા, બિન-નસબંધીવાળા અને રસી વગરના કૂતરાઓ આવશે. આનાથી વધુ સંઘર્ષ અને જાહેર આરોગ્ય માટે જોખમ ઊભું થશે.
•     તેમણે ઉદાહરણ આપ્યું કે જ્યાં ABC કાર્યક્રમનો ગંભીરતાપૂર્વક અમલ થયો છે, ત્યાં સફળતા મળી છે. જેમ કે જયપુરમાં 70% અને લખનૌમાં 84% કૂતરાઓની નસબંધી થઈ છે, જેણે પ્રાણીઓને શાંત બનાવ્યા છે અને કરડવાના કિસ્સાઓ પણ ઘટાડ્યા છે.
 
સુપ્રીમ કોર્ટનો આદેશ અને સેલિબ્રિટીઝની પ્રતિક્રિયા
જસ્ટિસ જે.બી. પારડીવાલા અને આર. મહાદેવનની બેન્ચે આદેશ આપ્યો છે કે દિલ્હી-એનસીઆરના તમામ વિસ્તારો રખડતા કૂતરાઓથી મુક્ત હોવા જોઈએ અને પકડાયેલા કોઈ પણ પ્રાણીને ફરીથી રસ્તા પર છોડવામાં આવશે નહીં. જ્હોન અબ્રાહમ ઉપરાંત, જાહ્નવી કપૂર, વરુણ ધવન, વીર દાસ અને અન્ય ઘણી સેલિબ્રિટીઓએ પણ સોશિયલ મીડિયા પર આ આદેશની ટીકા કરી છે.