નવી દિલ્હી: દિલ્હીમાં જૂના વાહનોના માલિકોને સુપ્રીમ કોર્ટ તરફથી મોટી રાહત મળી છે. કોર્ટે 10 વર્ષ જૂના ડીઝલ અને 15 વર્ષ જૂના પેટ્રોલ વાહનો સામે હાલ પૂરતું કોઈ કાર્યવાહી ન કરવાનો નિર્દેશ આપ્યો છે. આ મામલો 2018ના આદેશ સાથે સંબંધિત છે, જેમાં દિલ્હીમાં જૂના ડીઝલ અને પેટ્રોલ વાહનો પર પ્રતિબંધ મૂકવાનો નિર્ણય લેવામાં આવ્યો હતો. દિલ્હી સરકારે આ આદેશ પર પુનર્વિચારણા કરવા માટે સુપ્રીમ કોર્ટમાં અરજી દાખલ કરી હતી. સુનાવણી દરમિયાન, સુપ્રીમ કોર્ટે સ્પષ્ટ કર્યું કે 'એન્ડ ઓફ લાઇફ વ્હીકલ્સ' એટલે કે છેલ્લા તબક્કામાં પહોંચી ગયેલા વાહનોના માલિકો સામે કોઈ બળજબરી કે દંડાત્મક કાર્યવાહી કરવામાં આવશે નહીં. કોર્ટે કેન્દ્ર સરકારને નોટિસ જારી કરી છે અને ચાર અઠવાડિયામાં જવાબ આપવા કહ્યું છે.

હવે આ મામલાની સુનાવણી ચાર અઠવાડિયા પછી ફરી થશે. આ આદેશ ચીફ જસ્ટિસ બી. આર. ગવઈની અધ્યક્ષતાવાળી બેન્ચ દ્વારા આપવામાં આવ્યો હતો. કોર્ટના આ નિર્ણયથી દિલ્હી અને આસપાસના વિસ્તારોમાં જૂના વાહનોના માલિકોને હાલ પૂરતી મોટી રાહત મળી છે, જોકે અંતિમ નિર્ણય સુનાવણી પછી જ લેવામાં આવશે.

દિલ્હી-એનસીઆરમાં જૂના વાહનો પર સુપ્રીમ કોર્ટનો તાજેતરનો નિર્ણય છેલ્લા ઘણા મહિનાઓથી ચાલી રહેલી કડકાઈ વચ્ચે એક મહત્વપૂર્ણ વળાંક છે. રાજધાનીમાં 10 વર્ષથી વધુ જૂના ડીઝલ વાહનો અને 15 વર્ષથી વધુ જૂના પેટ્રોલ વાહનો પર પહેલાથી જ પ્રતિબંધ છે. કમિશન ફોર એર ક્વોલિટી મેનેજમેન્ટ (CAQM) અને ટ્રાન્સપોર્ટ ડિપાર્ટમેન્ટે તેમને 'એન્ડ ઓફ લાઇફ' એટલે કે EOL વાહનો જાહેર કર્યા છે.

1 જુલાઈથી, પેટ્રોલ પંપ પર ANPR કેમેરા લગાવવામાં આવ્યા હતા, જે આવા વાહનોની નંબર પ્લેટ ઓળખે છે અને તેમને ઇંધણ આપતા અટકાવે છે. દિલ્હી સરકારે પોલીસ અને ટ્રાન્સપોર્ટ એન્ફોર્સમેન્ટ ટીમો સાથે મળીને ઘણા વિસ્તારોમાં દેખરેખ વધારી દીધી હતી. પેટ્રોલ પંપોને ચેતવણી આપવામાં આવી હતી કે જો તેઓ પ્રતિબંધિત વાહનોને ઇંધણ આપશે તો તેમની સામે કાર્યવાહી કરવામાં આવશે.

જોકે, સુપ્રીમ કોર્ટે હાલમાં વાહન માલિકોને રાહત આપી છે. કોર્ટે કહ્યું કે આ વાહનો પર કોઈ ફરજિયાત દંડ કે જપ્તી નહીં થાય. આ આદેશ ત્યારે આવ્યો જ્યારે દિલ્હી સરકારે જૂના વાહનો માટે પેટ્રોલ અને ડીઝલનું વેચાણ બંધ કરવાની યોજના અમલમાં મૂકી હતી. હવે કેન્દ્ર અને અન્ય પક્ષો પાસેથી જવાબ માંગવામાં આવ્યો છે, અને કેસની આગામી સુનાવણી ચાર અઠવાડિયા પછી થશે.