નવી દિલ્હી: ભારતીય ઉડ્ડયન નિયમનકાર ડિરેક્ટોરેટ જનરલ ઓફ સિવિલ એવિએશન (DGCA) એ એરલાઇન ઇન્ડિગોને કારણ બતાવો નોટિસ ફટકારી છે. DGCA નો આરોપ છે કે ઇન્ડિગોએ તેના 1,700 પાઇલટ્સને 'બિન-લાયકાત ધરાવતા સિમ્યુલેટર' પર તાલીમ આપી હતી, જે નિયમોનું ગંભીર ઉલ્લંઘન છે.
  DGCA દ્વારા ઇન્ડિગોના રેકોર્ડ્સની તપાસમાં જાણવા મળ્યું કે કોઝિકોડ, લેહ અને કાઠમંડુ જેવા 'જટિલ' એરફિલ્ડ માટે જરૂરી એરપોર્ટ મોડેલ માટે ઘણા ફુલ ફ્લાઇટ સિમ્યુલેટર્સ (FFS) લાયક કે મંજૂર નહોતા, તેમ છતાં તેનો ઉપયોગ તાલીમ માટે કરવામાં આવ્યો.
 નોટિસમાં જણાવવામાં આવ્યું છે કે કુલ 20 સિમ્યુલેટરમાં આવી સમસ્યાઓ જોવા મળી હતી, જેમાંથી દિલ્હી, ચેન્નઈ, હૈદરાબાદ, ગ્રેટર નોઈડા, ગુરુગ્રામ અને બેંગલુરુના કેટલાક સિમ્યુલેટર્સ લાયક ન હોવા છતાં તેનો ઉપયોગ થયો હતો.
 DGCA એ કહ્યું કે ઇન્ડિગોના તાલીમ નિર્દેશક તમામ ઉડ્ડયન જરૂરિયાતોનું પાલન સુનિશ્ચિત કરવા માટે જવાબદાર હતા, પરંતુ તેઓ આ જોગવાઈઓનું ઉલ્લંઘન કરવામાં નિષ્ફળ રહ્યા.
 DGCA એ ઇન્ડિગોને આ નોટિસ મળ્યાના 14 દિવસની અંદર જવાબ આપવા જણાવ્યું છે. જો ઇન્ડિગો જવાબ નહીં આપે તો તેની સામે એકપક્ષીય કાર્યવાહી કરવામાં આવશે. ઇન્ડિગોના પ્રવક્તાએ નોટિસ મળ્યાની પુષ્ટિ કરી છે અને જણાવ્યું છે કે તેઓ તેની સમીક્ષા કરી રહ્યા છે અને નિયત સમયમર્યાદામાં જવાબ આપશે. તેમણે એ પણ ભારપૂર્વક કહ્યું કે ઇન્ડિગો તેની કામગીરીમાં સલામતી અને નિયમોના પાલનના ઉચ્ચતમ ધોરણો જાળવવા માટે પ્રતિબદ્ધ છે.