નવી દિલ્‍હી તા.૧૩: બજાર નિયમનકાર સેબીએ ઉદ્યોગપતિ અનિલ અંબાણીની અરજી ફગાવી દીધી છે, જેમાં તેમણે યસ બેંકમાં કરેલા રોકાણ સંબંધિત આરોપોની પતાવટની માંગ કરી હતી. હવે તેમને ઓછામાં ઓછા ૧,૮૨૮ કરોડ રૂપિયાનો દંડ થઈ શકે છે. આ કેસ ૨૦૧૬-૨૦૧૯ દરમિયાન રિલાયન્‍સ મ્‍યુચ્‍યુઅલ ફંડ (જે તે સમયે અંબાણીના નિયંત્રણ હેઠળ હતું) દ્વારા યસ બેંકના વધારાના ટાયર-૧ બોન્‍ડમાં રૂ. ૨,૧૫૦ કરોડના રોકાણ સાથે સંબંધિત છે. વર્ષ ૨૦૨૦ માં યસ બેંક પડી ભાંગી ત્‍યારે આ રકમ રાઈટ ઓફ કરવામાં આવી હતી.

સેબીએ કહ્યું છે કે આ રોકાણ યસ બેંક તરફથી અંબાણી ગ્રુપની અન્‍ય કંપનીઓને આપવામાં આવેલી લોનના બદલામાં કરવામાં આવ્‍યું હતું. આનાથી રોકાણકારોને ૧૮.૨૮ અબજ ડોલરનું નુકસાન થયું. રિલાયન્‍સ મ્‍યુચ્‍યુઅલ ફંડ ૨૦૧૯ માં નિપ્‍પોન લાઇફ ઇન્‍શ્‍યોરન્‍સને વેચવામાં આવ્‍યું હતું, પરંતુ આ આરોપો તે સમયથી છે જ્‍યારે તે અંબાણી પાસે હતું. ગયા મહિને, ઇડીએ યસ બેંક પાસેથી ૩,૦૦૦ કરોડ રૂપિયાની લોન હડપ કરવાના કેસની તપાસના ભાગ રૂપે અંબાણી ગ્રુપના પરિસરમાં દરોડા પાડ્‍યા હતા.

સેબીએ ૨૦૨૪-૨૫ માટેના તેના વાર્ષિક અહેવાલમાં કહ્યું છે કે લગભગ ૭૭,૮૦૦ કરોડ રૂપિયાના બાકી લેણાંની વસૂલાત મુશ્‍કેલ છે, જે ગયા વર્ષ કરતા ૨% વધુ છે. રિપોર્ટ અનુસાર, સેબીએ બજાર દેખરેખ વધારી છે. અલ્‍ગોરિધમિક ટ્રેડિંગ અને ડિજિટલ પ્‍લેટફોર્મના ઉદય વચ્‍ચે, સેબીએ પાલનને કડક બનાવ્‍યું છે અને આંતરિક વેપાર અને અસામાન્‍ય સોદાઓનું નિરીક્ષણ વધુ તીવ્ર બનાવ્‍યું છે.(૩૮.૫)