નવી દિલ્હી :  દિલ્હી મેટ્રો રેલ કોર્પોરેશન (DMRC) એ આગામી સ્વતંત્રતા દિવસની ઉજવણીને ધ્યાનમાં રાખીને મુસાફરો માટે ખાસ જાહેરાત કરી છે. લાલ કિલ્લા પર યોજાનાર કાર્યક્રમમાં ભાગ લેનારા લોકોની સુવિધા માટે, 15 ઓગસ્ટના રોજ દિલ્હી મેટ્રોની સેવાઓ વહેલી સવારે 4:00 વાગ્યાથી શરૂ થશે.
 સવારે 4:00 થી 6:00  આ બે કલાક દરમિયાન, દરેક લાઇન પરના ટર્મિનલ સ્ટેશનોથી દર 30 મિનિટના અંતરાલે મેટ્રો ટ્રેનો દોડશે. આનાથી લોકોને સમયસર લાલ કિલ્લા સુધી પહોંચવામાં મદદ મળશે.
સવારે 6:00 વાગ્યા પછી, મેટ્રો તેની નિયમિત સમયપત્રક અનુસાર ચાલશે.
લાલ કિલ્લા, જામા મસ્જિદ અને દિલ્હી ગેટ સ્ટેશનો લાલ કિલ્લાથી સૌથી નજીક છે, જ્યાંથી લોકો સરળતાથી સ્થળ પર પહોંચી શકે છે.
 
જેમની પાસે સંરક્ષણ મંત્રાલય દ્વારા જારી કરાયેલું મૂળ આમંત્રણ કાર્ડ હશે, તેમને દિલ્હી મેટ્રો તરફથી એક ખાસ QR ટિકિટ આપવામાં આવશે. આ ટિકિટનો ઉપયોગ કરીને તેઓ લાલ કિલ્લા સુધી મફતમાં મુસાફરી કરી શકશે. આ ટિકિટોનો ખર્ચ સંરક્ષણ મંત્રાલય DMRC ને ચૂકવશે.
આ ઉપરાંત, સ્વતંત્રતા દિવસને ધ્યાનમાં રાખીને મેટ્રો સ્ટેશનો પર સુરક્ષા પણ વધારી દેવામાં આવી છે. DMRC એ મુસાફરોને અપીલ કરી છે કે આ સમયગાળા દરમિયાન સ્ટેશનો પર ભીડને કારણે લાંબી કતારો લાગી શકે છે, તેથી મુસાફરીનું આયોજન કરતી વખતે વધારાનો સમય ફાળવીને નીકળવું.