ગૂગલ ક્રોમ ખરીદવા શ્રીનિવાસની કંપનીની $૩૪.૫ અબજની જંગી બિડ
ભારતીય મૂળના માલિકના ત્રણ વર્ષ જૂના એઆઈ સ્ટાર્ટ-અપની ઓલ કેશ ડીલની ઓફરથી વૈશ્વિક કોર્પોરેટ ક્ષેત્રમાં ખળભળાટ
વોશિંગ્ટન,તા.૧૪: ભારતીય મૂળના અરવિદ શ્રીનિવાસની આગેવાની હેઠળની એઆઈ કંપની પરપ્લેક્સિટીએ ગૂગલના ક્રોમ બ્રાઉઝરને ખરીદવા માટે ૩૪.૫ બિલિયન ડોલર (રૂ.૩.૦૨ લાખ કરોડ) ની જંગી ઓફર કરી છે. અરવિદ શ્રીનિવાસના ત્રણ વર્ષ જૂના આ સ્ટાર્ટ-અપનું વેલ્યુએશન માત્ર ૧૮ અબજ ડોલર છે, પરંતુ તેને ૩૪.૫ બિલિયન ડોલરના રોકડ સોદામાં ક્રોમ બ્રાઉઝર ખરીદવાની સાહસિક બિડ કરી છે.
ક્રોમ વિશ્વભરમાં ત્રણ અબજથી વધુ યુઝર્સ ધરાવે છે. એઆઇ આધારિત સર્ચ એન્જિનમાં પ્રભુત્વ માટેની તીવ્ર રેસ ચાલે છે ત્યારે ક્રોમ એક મહત્ત્વની એસેટ છે. પરપ્લેક્સિટીના ચીફ બિઝનેસ ઓફિસર દિમિત્રી શેવેલેન્કોએ જણાવ્યું હતું કે મોટી સંખ્યામાં મોટા ઇન્વેસ્ટમેન્ટ ફંડ્સ આ ટ્રાન્ઝેક્શન માટે ફાઇનાન્સ કરવા સંમત થયા છે. કંપનીએ એનવીડિયા અને જાપાનની સોફટબેન્ક સહિતના મુખ્ય રોકાણકારો પાસેથી અત્યાર સુધીમાં લગભગ ૧ અબજ ડોલર એકત્ર કર્યા છે.
પરપ્લેક્સિટીની ઓફર માત્ર ૩૪.૫ અબજ ડોલર સુધી સીમિત નથી. આ સ્ટાર્ટઅપે ક્રોમ ડેવલપમેન્ટ અને ઇન્ફ્રાસ્ટ્રક્ચર સુધારા માટે બે વર્ષમાં ૩ અબજ ડોલરનું રોકાણ કરવાની પણ પ્રતિબદ્ધતા વ્યક્ત કરી છે.
(9:59 AM IST)
છેલ્લા 8 દિવસમાં સૌથી લોકપ્રિય 
