મુંબઈ: 14 ઑગસ્ટ, 2025: દેશના 79માં સ્વાતંત્ર્ય દિનના અવસરે સ્ટેટ બેન્ક ઓફ ઇન્ડિયા (SBI)એ 'અગ્નિવીર' જવાનો માટે એક ખાસ સુવિધાની જાહેરાત કરી છે. હવેથી, સરકારી 'અગ્નિપથ' યોજના હેઠળ સેવા આપી રહેલા જવાનો કોઇપણ ગેરંટી કે પ્રોસેસિંગ ફી વગર ₹4 લાખ સુધીની પર્સનલ લોન મેળવી શકશે.

અગ્નિવીર જવાનોને લોન માટે કોઇપણ પ્રકારની કોલેટરલ એટલે કે ગેરંટી આપવાની જરૂર રહેશે નહીં.
SBIએ લોન પર લાગતી પ્રોસેસિંગ ફી સંપૂર્ણપણે માફ કરી છે.
આ લોનનો કાર્યકાળ 'અગ્નિપથ' યોજનાના સમયગાળા અનુસાર હશે, જેથી જવાનોને લોનની ચુકવણીમાં કોઈ મુશ્કેલી ન પડે.
SBIએ તમામ સંરક્ષણ કર્મચારીઓ માટે 30 સપ્ટેમ્બર, 2025 સુધી પર્સનલ લોન પર ફક્ત 10.50% નો ફ્લેટ વ્યાજ દર જાહેર કર્યો છે, જે હાલના બજાર દરો કરતા ઘણો ઓછો છે.

બેંકના ચેરમેન સી.એસ. સેટ્ટીએ જણાવ્યું કે, "જે લોકો દેશની રક્ષા કરી રહ્યા છે તેઓ અમારા સંપૂર્ણ સમર્થનને પાત્ર છે. પ્રોસેસિંગ ફી માફ કરવી એ માત્ર એક શરૂઆત છે, અને ભવિષ્યમાં બેંક આવા અનેક પગલાં ભરશે જે આપણા સૈનિકોને સશક્ત બનાવશે." આ નવી યોજના SBIની હાલની 'ડિફેન્સ સેલરી પેકેજ' જેવી યોજનાઓમાં વધુ લાભ ઉમેરશે.