મોસ્કો : ભારતના 79મા સ્વતંત્રતા દિવસ નિમિત્તે, રશિયાના રાષ્ટ્રપતિ વ્લાદિમીર પુતિનએ ભારતના રાષ્ટ્રપતિ દ્રૌપદી મુર્મુ અને વડાપ્રધાન નરેન્દ્ર મોદીને અભિનંદન પાઠવ્યા છે. પોતાના સંદેશમાં, તેમણે ભારતની પ્રશંસા કરતાં કહ્યું કે ભારતે સામાજિક-આર્થિક, વૈજ્ઞાનિક અને તકનીકી ક્ષેત્રોમાં નોંધપાત્ર સફળતાઓ મેળવી છે.

પુતિને ભારપૂર્વક જણાવ્યું કે, "ભારતને વૈશ્વિક મંચ પર યોગ્ય સન્માન મળે છે અને આંતરરાષ્ટ્રીય મુદ્દાઓના ઉકેલમાં તે મહત્વપૂર્ણ ભૂમિકા ભજવી રહ્યું છે."
 
પુતિને ભારત સાથેની રશિયાની "વિશેષાધિકૃત વ્યૂહાત્મક ભાગીદારી"ને ખૂબ જ મહત્વપૂર્ણ ગણાવી. તેમણે કહ્યું, "મને વિશ્વાસ છે કે, અમારા સંયુક્ત પ્રયાસો દ્વારા, અમે વિવિધ ક્ષેત્રોમાં દ્વિપક્ષીય સહયોગ વધારવાનું ચાલુ રાખીશું. તે આપણા મૈત્રીપૂર્ણ સંબંધો અને બંને દેશોના લોકોના હિત સાથે સંપૂર્ણપણે જોડાયેલું છે. તે પ્રાદેશિક અને વૈશ્વિક સ્તરે બંને દેશોની સુરક્ષા અને સ્થિરતાને મજબૂત બનાવવામાં મદદરૂપ છે."
 
પુતિનનો આ સંદેશ એવા સમયે આવ્યો છે જ્યારે અમેરિકા અને ભારત વચ્ચે ટેરિફને લઈને તણાવ ચાલી રહ્યો છે. આ જ દિવસે, અમેરિકાના રાષ્ટ્રપતિ ડોનાલ્ડ ટ્રમ્પ અને પુતિન અલાસ્કામાં યુક્રેન યુદ્ધના અંત માટે બેઠક કરવાના છે. જો આ બેઠક સફળ થાય છે, તો ભારત પર રશિયન તેલની આયાતને કારણે લાગેલા 25% વધારાના ટેરિફને ટાળી શકાય છે. આનાથી ભારત અને અમેરિકાના સંબંધોમાં સુધાર થવાની આશા છે.

અમેરિકાના વિદેશ સચિવ માર્કો રુબિયોએ પણ ભારતને સ્વતંત્રતા દિવસની શુભેચ્છા પાઠવી હતી અને બંને દેશો વચ્ચેના મજબૂત ઐતિહાસિક સંબંધોનો ઉલ્લેખ કર્યો હતો. આ ઘટનાઓ દર્શાવે છે કે આંતરરાષ્ટ્રીય રાજકારણમાં ભારત એક મહત્વપૂર્ણ અને સન્માનનીય સ્થાન ધરાવે છે.