નવી દિલ્હી : અમેરિકા અને ભારત વચ્ચેના સંબંધોમાં તણાવ સતત વધી રહ્યો છે. રશિયા પાસેથી તેલ ખરીદવાના મુદ્દે અમેરિકા દ્વારા ભારત પર સતત દબાણ વધી રહ્યું છે. હવે તો વ્હાઇટ હાઉસના એક અધિકારીએ આ મામલે ચોંકાવનારું નિવેદન આપ્યું છે. વ્હાઇટ હાઉસના વેપાર સલાહકાર પીટર નાવારોએ એક લેખમાં જણાવ્યું છે કે ભારત ચીન અને રશિયાની નજીક જઈ રહ્યું છે, જેના કારણે તેને શસ્ત્રો વેચવાનું જોખમી બની ગયું છે.

નાવારોએ પોતાના લેખમાં લખ્યું છે કે, "જો ભારત ઇચ્છે છે કે તેની સાથે વ્યૂહાત્મક ભાગીદાર તરીકે વ્યવહાર કરવામાં આવે, તો તેણે પણ આવું જ કરવું જોઈએ." તેમણે કહ્યું કે, ભારત રશિયન તેલનો સૌથી મોટો ખરીદદાર બની રહ્યું છે અને તેનાથી મળતા ડોલર રશિયાને મદદ કરી રહ્યા છે. આ જ કારણોસર, અમેરિકન લશ્કરી ટેકનોલોજી ભારતને આપવી હવે જોખમી છે.

બીજી તરફ, ભારતે આ આરોપોને ફગાવતા સ્પષ્ટ કર્યું છે કે તેલની ખરીદી દેશના આર્થિક હિતમાં લેવાયેલો નિર્ણય છે. ભારતના વિદેશ મંત્રાલયે અમેરિકાને જવાબ આપતા કહ્યું કે અમેરિકા અને યુરોપિયન યુનિયનના ઘણા દેશો પણ રશિયા પાસેથી માલ ખરીદી રહ્યા છે.

અમેરિકન રાષ્ટ્રપતિ ડોનાલ્ડ ટ્રમ્પે પહેલાથી જ ભારત પર 25% + 25% નો ટેરિફ લાગુ કરી દીધો છે. તેમણે આનું કારણ ભારતનું બ્રિક્સ દેશોની નજીક જવું અને રશિયા પાસેથી તેલ ખરીદવું ગણાવ્યું હતું. તાજેતરમાં, પુતિન સાથેની મુલાકાત પહેલા પણ ટ્રમ્પે ભારતનું નામ લીધું હતું અને કહ્યું હતું કે ટેરિફને કારણે રશિયાએ ભારત જેવો મોટો ગ્રાહક ગુમાવ્યો છે.

આ સંજોગોમાં, આંતરરાષ્ટ્રીય રાજકારણમાં ભારત એક કઠિન સ્થિતિમાં મુકાયું છે, જ્યાં તેને તેના રાષ્ટ્રીય હિતો અને વ્યૂહાત્મક ભાગીદારીઓ વચ્ચે સંતુલન જાળવવું પડશે.