છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
મુંબઈ પાણી-પાણી : ૯૬ કલાકમાં ૨૬.૨૨ ઈંચ
માયાનગરીમાં મેઘ તાંડવઃ મેઘો ધોધમાર... અનરાધારઃ ૨૪ કલાકમાં ૧૨ ઇંચઃ રેલ્વે ટ્રેક-રસ્તાઓ જળબંબાકાર : અનેક વિસ્તારોમાં કેડ સુધીના પાણીઃ હોસ્પીટલો-પોલીસ સ્ટેશનો પાણીમાં ગરકાવ
મુંબઈ, તા.૧૯: દેશની આર્થિક રાજધાની મુંબઈ છેલ્લા ચાર દિવસથી ભારે વરસાદને કારણે દયનીય બની ગઈ છે. છેલ્લા ૨૪ કલાકમાં ૧૨ ઇંચ રેકોર્ડ વરસાદ નોંધાયો છે. આના કારણે ઘણા વિસ્તારોમાં કમર સુધી પાણી ભરાઈ ગયા છે. આનાથી માત્ર ટ્રાફિક જ નહીં પરંતુ સામાન્ય જનજીવન પણ ખોરવાઈ ગયું છે. જ્યારે શાળાઓ અને કોલેજો બંધ કરવામાં આવી છે, ત્યારે ફ્લાઇટ્સ પણ ખરાબ રીતે પ્રભાવિત થઈ છે. હવામાન વિભાગે આજે રેડ એલર્ટ પણ જારી કર્યું છે. દરમિયાન, મહારાષ્ટ્રના મુખ્યમંત્રી દેવેન્દ્ર ફડણવીસે સોમવારે કહ્યું હતું કે રાજ્યના ઘણા ભાગોમાં સતત વરસાદને કારણે સાત લોકોના મોત થયા છે.સોમવાર સવારથી શહેરમાં ભારે વરસાદ પડી રહ્યો છે, જેમાં ૯૬ કલાકમાં ૨૬.૨૨ ઇંચ વધુ વરસાદ નોંધાયો છે. ધોધમાર વરસાદને કારણે ચેમ્બુર, દાદર, હિંદમાતા, અંધેરી અને કિંગ્સ સર્કલ સહિતના અનેક વિસ્તારોમાં વ્યાપક પાણી ભરાઈ ગયા હતા, જેના કારણે રોજિંદા જીવન ખોરવાઈ ગયું હતું અને શહેરની પૂર તૈયારી અંગે નવી ચિંતાઓ ઉભી થઈ હતી.
રવિવારે મોડી રાતથી સતત ધોધમાર વરસાદ વરસી રહ્યો છે એને કારણે મુંબઈ પાણી-પાણી થઈ ગયું હતું. સવારથી ૮ કલાકમાં ૧૭૦ મિલીમીટર વરસાદ ખાબકતાં મુંબઈગરાઓ ભારે મુશ્કેલીમાં મુકાઈ ગયા હતા. સોમવારે સવારે વધુ વરસાદ પડ્યો હતો અને એ જ સમયે ઑફિસ જવા નીકળેલા લોકો રસ્તા પર અને ટ્રેનમાં અટવાઈ ગયા હતા. અરબી સમુદ્રમાં સર્જાયેલા અપર સાયક્લોનિક સર્કલને કારણે મહારાષ્ટ્રમાં અતિભારે વરસાદ પડ્યો હતો. હવામાન ખાતાએ આજે પણ પાલઘર, થાણે, મુંબઈ અને રાયગડમાં રેડ અલર્ટ જાહેર કરી છે. આવતી કાલે આ વિસ્તારોમાં ઑરેન્જ અલર્ટ જાહેર કરવામાં આવી છે.
વિક્રોલીમાં દિવસનો સૌથી વધુ ૧૩૯.૯ મિલીમીટર વરસાદ નોંધાયો હતો. વડાલા, ચેમ્બુર, ડોમ્બિવલી, દાદર, અંધેરીના નીચાણવાળા તમામ વિસ્તારો પાણીમાં ગરકાવ થઈ ગયા હતા અને ત્યાં સરેરાશ ૧૫૦ મિલીમીટર વરસાદ નોંધાયો હતો. રસ્તાઓ પર કમર સુધીનાં પાણી ભરાયાં હતાં. ચેમ્બુરની એક પ્રાઇવેટ હૉસ્પિટલમાં પાણી ઘૂસી ગયાં હતાં અને ડોમ્બિવલીના પોલીસ-સ્ટેશનમાં પાણી ભરાયાં હતાં. વેસ્ટર્ન એક્સપ્રેસ હાઇવે પર કાંદિવલીના ઠાકુર વિલેજ પાસે સિગ્નલ-ફેલ્યરને લીધે વાહનોની લાંબી કતાર લાગી ગઈ હતી અને એમાં એક ઍમ્બ્યુલન્સ ફસાતાં દરદીએ હાલાકી વેઠવી પડી હતી. બેસ્ટની બસોને પાણી ભરાયું હોય એ રોડને બદલે અન્ય રોડ પર ડાયવર્ટ કરવામાં આવી હતી.
સેન્ટ્રલ રેલવેમાં સાયન અને મસ્જિદ સ્ટેશનો નજીક ટ્રૅક પર પાણી ભરાયાં હતાં એથી સેન્ટ્રલ રેલવેની ટ્રેનો મોડી દોડી હતી. થાણે સ્ટેશન પર પ્રવાસીઓની ચિક્કાર ગિરદી જોવા મળી હતી. મુંબઈ-ગોવા હાઇવે પર પણ પાણી ભરાયાં હતાં જેને કારણે વાહનવ્યવહારને ભારે અસર થઈ હતી. બપોર પછી સ્કૂલ-કૉલેજોમાં રજા આપી દેવાઈ હતી, પણ એ સમયે વરસાદનું જોર વધતાં વિદ્યાર્થીઓને ઘરે જવામાં ભારે મુશ્કેલી પડી હતી.
BMCએ પાણી ખેંચવાના ૪૦૦ પમ્પ ગોઠવીને વિવિધ વિસ્તારોમાં ભરાયેલાં પાણીનો નિકાલ કર્યો.
નૅશનલ ડિઝૅસ્ટર મૅનેજમેન્ટની ટીમ અને મિલિટરીને સજ્જ કરવામાં આવી.
સરકારી અધિકારીઓને ઑફિસથી વહેલા નીકળવાની પરવાનગી આપવામાં આવી.
વરસતા વરસાદમાં સેન્ટ્રલ રેલવે અને મુંબઈ રેલવે વિકાસ કૉર્પોરેશને ભાંડુપના ફુટઓવર બ્રિજ પર બે કલાક ૧૦ મિનિટમાં ૭ ગર્ડર બેસાડવાનું કામ કર્યું.
માટુંગામાં ૭ કલાકથી વધુ સમય માટે વીજળી ગુલ.
હિન્દમાતા અને ગાંધી માર્કેટ વિસ્તારોમાં ૧.૫ ફુટ જેટલાં પાણી ભરાયાં.
અંધેરી સબવેમાં પાંચ ફુટ જેટલાં પાણી ભરાયાં. સવારે ૯.૪૦ વાગ્યાથી સાંજે પાંચ વાગ્યા સુધી અંધેરી સબવે વાહનો માટે બંધ કરવામાં આવ્યો હતો. પોઇસર સબવેમાં ૩ ફુટ જેટલાં પાણી ભરાયાં.
સતત વરસાદને કારણે નાંદેડ જિલ્લામાં ૨૦૦ થી વધુ ગ્રામજનો ફસાયેલા છે, જેના કારણે અધિકારીઓએ બચાવ અને રાહત કામગીરી માટે સેના તૈનાત કરવી પડી છે. રાજ્ય સચિવાલયમાં એક બેઠકમાં વરસાદની સ્થિતિની સમીક્ષા કર્યા પછી, ફડણવીસે સોશિયલ મીડિયા પ્લેટફોર્મ X પર પોસ્ટ કર્યું, અત્યાર સુધી સાત લોકોએ જીવ ગુમાવ્યા છે. કોંકણમાં કેટલીક નદીઓનું પાણીનું સ્તર ખતરનાક સ્તરે પહોંચી ગયું છે અને જલગાંવમાં ભારે નુકસાન થયું છે. (રર.૩)
(2:39 PM IST)
