<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 20th August 2025

દેખાદેખીમાં દેવાળિયો થઈ રહેલો મધ્યમ વર્ગ: ઉધારની જિંદગી જીવતાં ભારતીયોની આર્થિક સદ્ધરતા જોખમમાં

૨૦૨૪માં ક્રેડિટ કાર્ડનું દેવું ન ચૂકવી શકનારા ડિફોલ્ટર્સની સંખ્યા વધીને ૨૮.૪૨% પર પહોંચી: બેંકોની નોન પર્ફોમિંગ એસેટ (એનપીએ) ₹૬,૭૪૨ કરોડ સુધી પહોંચ્યું: છેલ્લા પાંચ વર્ષમાં ક્રેડિટ કાર્ડ એનપીએમાં ૫૦૦%નો તોતિંગ વધારો નોંધાયો

લોભામણી સ્કીમો અને સોશિયલ મીડિયાના પ્રભાવ હેઠળ ભારતીય મધ્યમ વર્ગ દેવાના બોજ તળે દબાઈ રહ્યો છે. ક્રેડિટ કાર્ડનું દેવું, પર્સનલ લોન અને 'બાય નાઉ પે લેટર' જેવી યોજનાઓ લોકોને આકર્ષી રહી છે, જેનું પરિણામ ગંભીર આર્થિક મુશ્કેલીઓ અને વધી રહેલા ડિફોલ્ટના કિસ્સાઓ તરીકે સામે આવી રહ્યું છે. તાજેતરમાં આરબીઆઈ દ્વારા જારી કરાયેલા આંકડા આ ખતરનાક ટ્રેન્ડની પુષ્ટિ કરે છે.

 

 

આજના યુગમાં મધ્યમ વર્ગીય ભારતીય પરિવારની જીવનશૈલી ઉધાર ઉપર નિર્ભર બની ગઈ છે. દેખાદેખી અને સોશિયલ મીડિયા પર દેખાતી વૈભવી જીવનશૈલીની નકલ કરવાના પ્રયાસમાં લોકો મોંઘીદાટ ચીજવસ્તુઓ અને અનુભવો ખરીદવા માટે લોન અને ક્રેડિટ કાર્ડનો બેફામ ઉપયોગ કરી રહ્યા છે. આકર્ષક EMI વિકલ્પો, 'બાય નાઉ પે લેટર' જેવી સ્કીમો, અને 'નો કોસ્ટ EMI' જેવી લલચામણી ઓફરો મધ્યમ વર્ગને દેવાના ચક્રવ્યૂહમાં ફસાવી રહી છે.

 

 

ક્રેડિટ કાર્ડ કંપનીઓ દ્વારા કુલ બિલના માત્ર ૫% ચૂકવવાની લાલચ આપીને ઉપભોક્તા પાસેથી ૩.૫% જેટલું ઊંચું વ્યાજ વસૂલવામાં આવે છે, જે દેવાના બોજને વધુ ગંભીર બનાવે છે. એકવાર આ ચક્રમાં ફસાયેલ વ્યક્તિ માટે તેમાંથી બહાર નીકળવું લગભગ અશક્ય બની જાય છે અને કેટલાક કિસ્સાઓમાં તો આત્મહત્યા જેવી કરુણ ઘટનાઓ પણ બની રહી છે.

 

 

રિઝર્વ બેન્ક ઓફ ઇન્ડિયા (RBI) દ્વારા જારી કરાયેલા આંકડા આ ચિંતાજનક પરિસ્થિતિની સાબિતી આપે છે. વર્ષ ૨૦૨૪માં ક્રેડિટ કાર્ડનું દેવું ન ચૂકવી શકનારા ડિફોલ્ટર્સની સંખ્યા વધીને ૨૮.૪૨% પર પહોંચી ગઈ હતી. આ જ સમયગાળા દરમિયાન, બેંકોની નોન પર્ફોમિંગ એસેટ (NPA) ₹૬,૭૪૨ કરોડ સુધી પહોંચી હતી, જે પાછલા વર્ષની તુલનામાં અનેકગણી વધારે છે. છેલ્લા પાંચ વર્ષમાં ક્રેડિટ કાર્ડ NPAમાં ૫૦૦%નો તોતિંગ વધારો નોંધાયો છે.

 

બચતને બદલે ઉધાર પર આધાર રાખવાની આ માનસિકતા મધ્યમ વર્ગની આર્થિક સદ્ધરતાને ગંભીર નુકસાન પહોંચાડી રહી છે. સમાજે અને વ્યક્તિએ આ આકર્ષણોથી સાવધ રહીને પોતાની આર્થિક મર્યાદાઓ સમજવી અત્યંત જરૂરી છે.

(9:39 AM IST)