નવી દિલ્હી : રશિયન ક્રૂડ ઓઈલની ખરીદી પર અમેરિકાએ ભારત પર ટેરિફ લાદતા, રશિયાએ ભારતને ખુલ્લેઆમ ટેકો આપ્યો છે. ભારતમાં રશિયન દૂતાવાસના ચાર્જ ડી'અફેર્સ રોમન બાબુશ્કિન એ અમેરિકાના આ નિર્ણયને અન્યાયી અને એકતરફી ગણાવ્યો છે.

દિલ્હીમાં એક પત્રકાર પરિષદને સંબોધતા રોમન બાબુશ્કિને અમેરિકાને કડક જવાબ આપતા કહ્યું કે, "જો કોઈ પશ્ચિમી દેશ તમારી ટીકા કરી રહ્યો છે, તો તેનો અર્થ એ છે કે તમે યોગ્ય કાર્ય કરી રહ્યા છો."

આ નિવેદન એવા સમયે આવ્યું છે જ્યારે ભારતના વિદેશ મંત્રી એસ. જયશંકર રશિયા-ભારત આંતર-સરકારી આયોગની સહ-અધ્યક્ષતા માટે મોસ્કોની મુલાકાતે છે.

રશિયાનો મજબૂત ટેકો:
બાબુશ્કિને ભારપૂર્વક કહ્યું કે રશિયાને એવી અપેક્ષા નથી કે ભારત રશિયન તેલ ખરીદવાનું બંધ કરી દેશે, ભલે ગમે તેટલું દબાણ આવે. તેમણે કહ્યું, "અમે ભારત માટેની પડકારજનક પરિસ્થિતિઓથી વાકેફ છીએ. આ જ સાચી વ્યૂહાત્મક ભાગીદારી છે. ગમે તે થાય, અમે કોઈપણ સમસ્યાને દૂર કરવા માટે પ્રતિબદ્ધ છીએ."

તેમણે ઉમેર્યું કે રશિયા તેલનો સૌથી મોટો ઉત્પાદક છે અને ભારત સૌથી મોટો ગ્રાહક છે. કોઈપણ એકપક્ષીય કાર્યવાહીથી સપ્લાય ચેઇનમાં અવરોધ, કિંમતમાં અસંતુલન અને વૈશ્વિક બજારોમાં અસ્થિરતા આવે છે, જે વિકાસશીલ દેશોની ઊર્જા સુરક્ષા માટે જોખમી છે.

અમેરિકા પર આકરા પ્રહાર:
બાબુશ્કિને અમેરિકાની આ નીતિને 'નવ-વસાહતી શક્તિઓ' જેવી ગણાવી જે ફક્ત પોતાના ફાયદા વિશે વિચારે છે. તેમણે સ્પષ્ટ શબ્દોમાં કહ્યું કે જો ભારત રશિયન તેલ લેવાનો ઇનકાર કરે, તો પશ્ચિમ સાથે સમાન સહયોગ થશે નહીં કારણ કે પશ્ચિમી દેશોના સ્વભાવમાં આ નથી.

આ નિવેદન દર્શાવે છે કે આંતરરાષ્ટ્રીય સ્તરે રાજકીય અને આર્થિક સમીકરણો ઝડપથી બદલાઈ રહ્યા છે, જેમાં રશિયા અને ભારત વચ્ચેનો સંબંધ વધુ મજબૂત બની રહ્યો છે.