ન્યૂયોર્ક: અમેરિકાના જાણીતા જજ અને રિયાલિટી કોર્ટ શો 'કૉટ ઇન પ્રોવિડન્સ' થી સમગ્ર વિશ્વમાં લોકપ્રિયતા મેળવનાર ફ્રેન્ક કેપ્રિયોનું 88 વર્ષની વયે નિધન થયું છે. છેલ્લા ઘણા સમયથી તેઓ સ્વાદુપિંડના કેન્સર સામે લડી રહ્યા હતા, પરંતુ આખરે તેઓ જીવનનો આ જંગ હારી ગયા. તેમના નિધનની પુષ્ટિ તેમના સત્તાવાર ઇન્સ્ટાગ્રામ એકાઉન્ટ પરથી કરવામાં આવી હતી, જેનાથી તેમના કરોડો ચાહકોમાં શોકની લાગણી ફેલાઈ છે.
ફ્રેન્ક કેપ્રિયોને વિશ્વભરમાં "દુનિયાના સૌથી દયાળુ જજ" (Nicest Judge in the World) તરીકે ઓળખવામાં આવે છે. તેમણે ન્યાયની સાથે-સાથે માનવતાનું પણ ઉત્તમ ઉદાહરણ પૂરું પાડ્યું હતું. તેમના કોર્ટરૂમમાં નાના-નાના કેસોમાં પણ તેમનો દયાળુ અને સંવેદનશીલ અભિગમ ઘણીવાર ઇન્ટરનેટ પર વાઇરલ થતો હતો. ટ્રાફિકના નિયમોનું ઉલ્લંઘન કરનારા અનેક લોકો જ્યારે તેમની કોર્ટમાં આવતા, ત્યારે તેઓ સજા આપવાને બદલે તેમની પરિસ્થિતિને સમજતા અને ઘણીવાર દંડ માફ કરી દેતા. તેમના આ માનવીય નિર્ણયોએ તેમને આંતરરાષ્ટ્રીય સ્તરે લોકપ્રિયતા અપાવી હતી.
કેપ્રિયોના કોર્ટરૂમના અનેક વીડિયો સોશિયલ મીડિયા પર કરોડો વખત જોવામાં આવ્યા છે. ક્યારેક બાળકો સાથે મજાકભરી વાતચીત કરવી તો ક્યારેક વૃદ્ધો પ્રત્યે સહાનુભૂતિ દર્શાવી તેમને રાહત આપવી - આવા અનેક વીડિયોએ દર્શકોના દિલ જીત્યા હતા. તેમની કોર્ટ સાથે સંબંધિત વીડિયોને અત્યાર સુધીમાં એક અબજથી વધુ વખત જોવામાં આવ્યા છે.
કારકિર્દી અને શોની લોકપ્રિયતા
વર્ષ 1936માં રોડ આઇલેન્ડના પ્રોવિડન્સમાં જન્મેલા કેપ્રિયોએ દાયકાઓ સુધી મ્યુનિસિપલ જજ તરીકે સેવા આપી હતી. જોકે, તેમને ખરી લોકપ્રિયતા ત્યારે મળી જ્યારે તેમની કોર્ટની કાર્યવાહીનું ટીવી પર પ્રસારણ શરૂ થયું. 'કૉટ ઇન પ્રોવિડન્સ' શો 2018 થી 2020 દરમિયાન રાષ્ટ્રીય સ્તરે પ્રસારિત થયો અને તેને અનેક એમી એવોર્ડ્સ માટે નામાંકન પણ મળ્યું હતું. આ શોનો મુખ્ય સંદેશ એ હતો કે ન્યાય માત્ર સજા આપવા પૂરતો સીમિત ન રહેવો જોઈએ, પરંતુ તેમાં કરુણા, સન્માન અને માનવીય ગરિમાનું પણ સ્થાન હોવું જોઈએ.
કેન્સર સામે લડાઈ અને શ્રદ્ધાંજલિ
વર્ષ 2023માં કેપ્રિયોએ જાહેરમાં જણાવ્યું હતું કે તેમને સ્વાદુપિંડનું કેન્સર છે. ત્યારથી તેઓ સતત સારવાર અને સંઘર્ષ વચ્ચે પોતાના ચાહકોને સોશિયલ મીડિયા દ્વારા અપડેટ આપતા રહ્યા હતા. થોડા અઠવાડિયા પહેલા જ તેમણે એક ભાવુક વીડિયો સંદેશ શેર કર્યો હતો, જેમાં તેમણે પોતાના સમર્થકોની પ્રાર્થનાઓની જરૂરિયાત વ્યક્ત કરી હતી. તેમણે સ્વીકાર્યું હતું કે બીમારીને કારણે તેમને ફરી હોસ્પિટલમાં દાખલ થવું પડ્યું છે, પરંતુ તેમને વિશ્વાસ હતો કે પ્રાર્થનાઓ તેમને બળ આપશે.
કેપ્રિયોના નિધન બાદ, રોડ આઇલેન્ડના ગવર્નર ડેન મૈકીએ તેમને "રોડ આઇલેન્ડનો સાચો ખજાનો" ગણાવીને રાજ્યમાં ઝંડો અડધો ઝુકાવવાનો આદેશ આપ્યો છે, જે તેમના પ્રત્યેના ઊંડા સન્માનને દર્શાવે છે.