વડાપ્રધાન નરેન્દ્ર મોદીએ ગુરુવારે કોંગ્રેસના સાંસદ રાહુલ ગાંધી અને વિપક્ષી પાર્ટીઓ પર આકરા પ્રહારો કર્યા. એક અનૌપચારિક ચા પાર્ટી દરમિયાન તેમણે કહ્યું કે કોંગ્રેસ પાર્ટીમાં રાહુલ ગાંધી કરતાં વધુ પ્રતિભાશાળી અને સારા વક્તા છે, પરંતુ તેમને બોલવાની તક આપવામાં આવતી નથી.

શું કહ્યું PM મોદીએ?
આ ચા પાર્ટી ફક્ત NDAના સાંસદો અને નેતાઓ માટે આયોજિત કરવામાં આવી હતી, જેમાં કોઈ વિપક્ષી સાંસદ હાજર રહ્યા નહોતા. આ દરમિયાન પીએમ મોદીએ આરોપ લગાવ્યો કે, "વિપક્ષી સાંસદોને સંસદમાં કાર્યવાહીમાં ખલેલ પહોંચાડવાની ફરજ પડે છે, કારણ કે તેઓ રાહુલ ગાંધી કરતાં વધુ સારા વક્તાઓ છે, પરંતુ તેમને યોગ્ય પ્લેટફોર્મ મળતું નથી." પીએમ મોદીએ આ વલણને લોકશાહી માટે હાનિકારક ગણાવ્યું.

સંસદનું ચોમાસુ સત્ર સમાપ્ત
ગુરુવારે સંસદનું ચોમાસુ સત્ર અનિશ્ચિત સમય માટે સ્થગિત કરવામાં આવ્યું. આ સત્ર દરમિયાન લોકસભા અધ્યક્ષ ઓમ બિરલાએ ગૃહમાં સતત થતા વિક્ષેપ પર નિરાશા વ્યક્ત કરી. તેમણે કહ્યું કે આયોજિત વિક્ષેપ લોકશાહીની ગરિમા વિરુદ્ધ છે.

આ સત્રમાં કુલ 14 સરકારી બિલ રજૂ કરવામાં આવ્યા હતા, જેમાંથી 12 બિલ પસાર કરવામાં આવ્યા. આ બિલોમાં ગોવા માટે અનુસૂચિત જનજાતિના વિધાનસભા મતવિસ્તારોના પુનર્ગઠન, મર્ચન્ટ શિપિંગ, અને ઓનલાઇન ગેમિંગના નિયમન સંબંધિત મહત્વપૂર્ણ બિલનો સમાવેશ થાય છે.

પીએમ મોદીના આ નિવેદનો એવા સમયે આવ્યા છે જ્યારે વિપક્ષ સતત સરકાર પર વિવિધ મુદ્દાઓ પર પ્રહાર કરી રહ્યો છે.