રાંચી : ઝારખંડ પોલીસને એક મોટી સફળતા મળી છે. કુખ્યાત ગેંગસ્ટર મયંક સિંહ ઉર્ફે સુનીલ મીણાને અઝરબૈજાનથી પ્રત્યાર્પણ કરીને શનિવારે સવારે રાંચી લાવવામાં આવ્યો છે. ઝારખંડ આતંકવાદ વિરોધી ટુકડી (ATS) એ આ કામગીરીને સફળતાપૂર્વક પાર પાડી છે.
 
ઝારખંડ ATS ના SP ઋષભ કુમાર ઝાના નેતૃત્વ હેઠળની એક ટીમે અઝરબૈજાન જઈને કાનૂની ઔપચારિકતાઓ પૂર્ણ કરી અને મયંક સિંહને પરત લાવ્યા. રાંચી એરપોર્ટ પર પહોંચ્યા બાદ SP ઝાએ પત્રકારોને જણાવ્યું કે, "ઝારખંડ પોલીસના ઇતિહાસમાં આ પ્રથમ સફળ પ્રત્યાર્પણ છે. અમને આશા છે કે વિદેશમાં હાજર અન્ય ગુનેગારોને પણ ટૂંક સમયમાં પરત લાવવામાં આવશે."

તેમણે આ સિદ્ધિનો શ્રેય રાજ્યના DGP, મુખ્યમંત્રી, અને રાજ્ય તેમજ કેન્દ્ર સરકારના સહયોગને આપ્યો.
 
પોલીસના જણાવ્યા અનુસાર, મયંક સિંહ ઝારખંડ, રાજસ્થાન અને પંજાબ સહિત અનેક રાજ્યોમાં ૫૦ થી વધુ ગંભીર ગુનાહિત કેસોમાં વોન્ટેડ હતો. તે કુખ્યાત અમન સાહુ ગેંગ નો મુખ્ય સભ્ય છે અને રાજસ્થાન સ્થિત ગેંગસ્ટરો સાથે સંબંધ સ્થાપિત કરવામાં તેની મુખ્ય ભૂમિકા હતી.

મયંક સિંહને ગયા વર્ષે ઑક્ટોબરમાં અઝરબૈજાનના દાતુ શહેરમાંથી પકડવામાં આવ્યો હતો. આજે તેને કોર્ટમાં રજૂ કરવામાં આવશે અને પોલીસ તેના રિમાન્ડની માંગ કરશે. આ પ્રત્યાર્પણથી ગુનેગારોને કડક સંદેશ મળ્યો છે કે તેઓ ગમે ત્યાં છુપાઈ શકે, પરંતુ કાયદાથી બચી શકશે નહીં.