જમ્મુ અને કાશ્મીરના ઘણા વિસ્તારોમાં ભારે વરસાદને કારણે, તાવી નદીમાં પૂર આવી રહ્યું છે. આ દરમિયાન, એક અહેવાલમાં દાવો કરવામાં આવ્યો છે કે ભારતે તાવીમાં સંભવિત પૂર અંગે પાકિસ્તાનને ચેતવણી આપી છે. પહેલગામ હુમલા પછી સિંધુ જળ સંધિ સ્થગિત હોવા છતાં, ભારતે પાકિસ્તાનને તાવી નદીમાં સંભવિત પૂર અંગે ચેતવણી આપી છે. ભારતે સંભવિત પૂર વિશે માહિતી શેર કરવા માટે પાકિસ્તાનનો સંપર્ક કર્યો છે.

ભારત કે પાકિસ્તાન બંનેમાંથી કોઈએ આ ઘટનાક્રમની પુષ્ટિ કરી નથી. સામાન્ય રીતે આવી માહિતી સિંધુ જળ કમિશનર દ્વારા શેર કરવામાં આવે છે. સૂત્રોને ટાંકીને, ભારતે પાકિસ્તાનને જમ્મુમાં તાવી નદીમાં સંભવિત મોટા પૂર વિશે ચેતવણી આપી છે. ઇસ્લામાબાદમાં ભારતીય ઉચ્ચાયુક્તે રવિવારે આ ચેતવણી આપી હતી.

અખબારે સૂત્રોને ટાંકીને જણાવ્યું હતું કે, મે મહિનામાં પાકિસ્તાન-ભારત સંઘર્ષ પછી આ આ પ્રકારનો પહેલો મોટો સંપર્ક છે. પાકિસ્તાની અધિકારીઓએ ભારત દ્વારા આપવામાં આવેલી માહિતીના આધારે ચેતવણી જારી કરી છે. 22 એપ્રિલના રોજ પહેલગામ આતંકવાદી હુમલાના એક દિવસ પછી, ભારતે પાકિસ્તાન વિરુદ્ધ અનેક પગલાં લીધાં, જેમાં 1960ની સિંધુ જળ સંધિને સ્થગિત કરવાનો પણ સમાવેશ થાય છે.

 જમ્મુ અને કાશ્મીરના ઘણા વિસ્તારોમાં ભારે વરસાદ પડી રહ્યો છે. જળ શક્તિ મંત્રીએ રવિવારે તમામ મુખ્ય નદીઓના પાણીના સ્તર પર નજર રાખવા સૂચના આપી હતી. ઝેલમ, રાવી અને તાવી અને તેમની સહાયક નદીઓ પર ખાસ ધ્યાન આપવાનું કહેવામાં આવ્યું છે. બીજી તરફ, હવામાન વિભાગે 27 ઓગસ્ટ સુધી વાદળ ફાટવા, પૂર અને ઊંચાઈવાળા વિસ્તારોમાં ભૂસ્ખલન સાથે મધ્યમથી ભારે વરસાદની આગાહી કરી છે.

ખરાબ હવામાનને કારણે સોમવારે જમ્મુ વિભાગમાં તમામ સરકારી અને ખાનગી શાળાઓ બંધ રહી. જમ્મુ કાશ્મીર બોર્ડ ઓફ સ્કૂલ એજ્યુકેશન દ્વારા ધોરણ 10 અને 11 ની પરીક્ષાઓ મુલતવી રાખવાની જાહેરાત કરવામાં આવી છે. જમ્મુ સ્કૂલ એજ્યુકેશન ડિરેક્ટોરેટે જણાવ્યું હતું કે ખરાબ હવામાનને ધ્યાનમાં રાખીને, 25 ઓગસ્ટના રોજ જમ્મુ ક્ષેત્રની તમામ સરકારી અને ખાનગી શાળાઓ બંધ રાખવાનો આદેશ આપવામાં આવે છે.