પૂર્વ ઉપરાષ્ટ્રપતિ જગદીપ ધનખડના અચાનક રાજીનામા પર છેલ્લા કેટલાક સમયથી ચાલી રહેલા રાજકીય વિવાદ અને અટકળોનો કેન્દ્રીય ગૃહમંત્રી અમિત શાહએ અંત લાવી દીધો છે. શાહે સ્પષ્ટપણે જણાવ્યું છે કે ધનખડે ફક્ત વ્યક્તિગત સ્વાસ્થ્ય કારણોસર રાજીનામું આપ્યું છે અને આ મુદ્દા પર વધુ પડતી અટકળો ન કરવી જોઈએ.
 
અમિત શાહનું નિવેદન
અમિત શાહે જણાવ્યું, "જગદીપ ધનખડજી બંધારણીય પદ પર હતા અને તેમના કાર્યકાળ દરમિયાન તેમણે બંધારણ અનુસાર ઉત્તમ કામ કર્યું. તેમણે પોતાની વ્યક્તિગત સ્વાસ્થ્ય સમસ્યાઓને કારણે રાજીનામું આપ્યું છે. કોઈએ તેને વધુ પડતું ખેંચીને કંઈક બીજું શોધવાનો પ્રયાસ ન કરવો જોઈએ."
 
રાજીનામાનો રાજકીય વિવાદ
જગદીપ ધનખડે ૨૧ જુલાઈ, ૨૦૨૫ના રોજ ઉપરાષ્ટ્રપતિ પદ પરથી રાજીનામું આપ્યું હતું. તેમણે રાજીનામામાં સ્વાસ્થ્યના કારણો અને તબીબી સલાહનો ઉલ્લેખ કર્યો હતો. જોકે, તેમના અચાનક રાજીનામાએ વિપક્ષને સવાલો ઉઠાવવાની તક આપી. કોંગ્રેસ સહિતના વિરોધ પક્ષોએ દાવો કર્યો કે રાજીનામા પાછળ અન્ય કારણો છે, જેમ કે સરકાર સાથેના મતભેદો અથવા ન્યાયાધીશ યશવંત વર્મા સામેના મહાભિયોગ પ્રસ્તાવનો મુદ્દો.

વિપક્ષે એવો પણ સવાલ ઉઠાવ્યો કે રાજીનામા બાદ જગદીપ ધનખડ જાહેર જીવનમાંથી ગાયબ કેમ થઈ ગયા છે. અમિત શાહના આ નિવેદનથી સરકારે આ સમગ્ર વિવાદ પર સ્પષ્ટતા આપી છે અને વિપક્ષના આરોપોને નકારી કાઢ્યા છે.