વૉશિંગ્ટન ડી.સી. 26 ઑગસ્ટ, 2025: અમેરિકાના રાજકારણમાં ફરી એકવાર ભૂકંપ આવ્યો છે. અમેરિકન રાષ્ટ્રપતિ ડોનાલ્ડ ટ્રમ્પે એક મોટી અને ચોંકાવનારી જાહેરાત કરી છે. તેમણે કહ્યું છે કે તેઓ દેશના હાલના *સુરક્ષા વિભાગ (ડિપાર્ટમેન્ટ ઓફ ડિફેન્સ)*નું નામ બદલીને ફરીથી 'યુદ્ધ વિભાગ' (ડિપાર્ટમેન્ટ ઓફ વૉર) કરવા જઈ રહ્યા છે. ટ્રમ્પના મતે, અમેરિકાને માત્ર સંરક્ષણની નહીં, પણ આક્રમણની પણ જરૂર છે.
 
ટ્રમ્પનો તર્ક: શા માટે નામ બદલવું જરૂરી?
સોમવારે ઓવલ ઓફિસમાં પત્રકારો સાથે વાત કરતા ડોનાલ્ડ ટ્રમ્પે જણાવ્યું કે, "થોડા અઠવાડિયામાં આ અંગે સત્તાવાર આદેશ જારી કરવામાં આવશે. આ માટે મને કોંગ્રેસની મંજૂરીની પણ જરૂર નથી." તેમણે ઉમેર્યું કે, "જ્યારે આપણે પ્રથમ અને બીજા વિશ્વયુદ્ધમાં જીત્યા, ત્યારે તેને યુદ્ધ વિભાગ કહેવામાં આવતું હતું. અને મારા માટે તે ખરેખર તે જ છે. દરેકને તે ગમે છે."

ટ્રમ્પે દક્ષિણ કોરિયાના રાષ્ટ્રપતિ લી જે મ્યુંગ સાથેની સંયુક્ત પત્રકાર પરિષદમાં પણ આ વાતનો પુનરોચ્ચાર કર્યો. તેમણે કહ્યું કે સુરક્ષા વિભાગનું જૂનું નામ વધુ શક્તિશાળી અને અસરકારક લાગતું હતું. તેમણે કહ્યું, "અમને ફક્ત સંરક્ષણ નથી જોઈતું. અમને હુમલો પણ જોઈએ છે."
 
ઇતિહાસમાં નામનો બદલાવ
નોંધનીય છે કે, અમેરિકામાં યુદ્ધ વિભાગની સ્થાપના 1789માં કરવામાં આવી હતી. આ વિભાગ 1947 સુધી આ જ નામથી ઓળખાતો હતો. ત્યારબાદ, તત્કાલીન રાષ્ટ્રપતિ હેરી ટ્રુમનએ તેનું નામ બદલીને સુરક્ષા વિભાગ (ડિપાર્ટમેન્ટ ઓફ ડિફેન્સ) રાખ્યું હતું. હવે, ટ્રમ્પ ફરીથી આ નામ બદલીને અમેરિકાની સૈન્ય શક્તિને વધુ આક્રમક રીતે દર્શાવવા માંગે છે.

આ નિર્ણય ટ્રમ્પની "અમેરિકા ફર્સ્ટ" અને શક્તિશાળી નીતિને અનુરૂપ છે, જે ભવિષ્યમાં આંતરરાષ્ટ્રીય રાજકારણ પર કેવી અસર કરશે તે જોવું રસપ્રદ રહેશે.