લખનૌ 26 ઑગસ્ટ, 2025: ભારતના વીર અવકાશયાત્રી અને ગ્રુપ કેપ્ટન શુભાંશુ શુક્લાએ આંતરરાષ્ટ્રીય અવકાશ મથકના ઐતિહાસિક મિશનને સફળતાપૂર્વક પૂર્ણ કર્યા બાદ મંગળવારે લખનૌમાં પોતાની જૂની શાળાની મુલાકાત લીધી. અલીગંજમાં આવેલી સિટી મોન્ટેસરી સ્કૂલના પરિસરમાં પહોંચતા જ વિદ્યાર્થીઓ અને શિક્ષકોએ તેમનું ઉષ્માભર્યું સ્વાગત કર્યું.
 
પૂરાણી યાદો તાજી થઈ
ઝરમર વરસાદ વચ્ચે, શુભાંશુ તેમની પત્ની કામના અને પુત્ર કિયાશ સાથે શાળાના કોરિડોરમાંથી પસાર થયા અને પોતાના વિદ્યાર્થીકાળની ક્ષણોને યાદ કરીને ભાવુક થયા. તેમણે મીડિયા સાથે વાત કરતા કહ્યું કે, "આ બધું ખૂબ જ પરિચિત લાગે છે. આ એ જ વર્ગો છે જ્યાં હું એક સમયે ભણતો હતો. આ લાગણી ખૂબ જ ખાસ છે. એવું લાગે છે કે હું ઘરે પાછો ફર્યો છું."

તેમણે મજાકમાં કહ્યું કે, "જે શિક્ષકોની સામે જવાથી હું એક સમયે ડરતો હતો, તેમને જોઈને આજે ખૂબ સારું લાગે છે. સમય ખરેખર બદલાઈ ગયો છે." તેમની આ વાત સાંભળીને શિક્ષકો પણ હસી પડ્યા અને આખા હોલમાં તાળીઓનો ગડગડાટ ગુંજી ઉઠ્યો. આ મુલાકાત દરમિયાન શુભાંશુ શુક્લાએ શાળામાં સ્થાપિત વિજ્ઞાન પ્રયોગશાળાનું પણ ઉદ્ઘાટન કર્યું.
 
રાકેશ શર્મા બાદ બીજા ભારતીય
નોંધનીય છે કે, ગ્રુપ કેપ્ટન શુભાંશુ શુક્લા રાકેશ શર્મા પછી અવકાશમાં જનાર બીજા ભારતીય બન્યા છે. આટલું જ નહીં, તેઓ આંતરરાષ્ટ્રીય અવકાશ મથક પર પહોંચનાર પ્રથમ ભારતીય નાગરિક પણ છે. તેમણે 'એક્સિઓમ-4' મિશન હેઠળ 18 દિવસનું અવકાશ મિશન સફળતાપૂર્વક પૂરું કર્યું.
 
યોગી સરકાર દ્વારા શિષ્યવૃત્તિની જાહેરાત
શુભાંશુ શુક્લાના આ અનોખા યોગદાનને બિરદાવતા ઉત્તર પ્રદેશના મુખ્યમંત્રી યોગી આદિત્યનાથે સોમવારે એક મોટી જાહેરાત કરી હતી. તેમણે કહ્યું કે, "શુભાંશુ શુક્લા અવકાશ મિશનનો ભાગ બનનાર ઉત્તર પ્રદેશના પ્રથમ નાગરિક છે, તેથી અમે અવકાશ ટેકનોલોજીનો અભ્યાસ કરવા ઈચ્છતા વિદ્યાર્થીઓ માટે તેમના નામ પર શિષ્યવૃત્તિ શરૂ કરીશું."

આ નિર્ણય ઉત્તર પ્રદેશમાં અવકાશ શિક્ષણને પ્રોત્સાહન આપશે અને યુવાનોને વિજ્ઞાનના ક્ષેત્રમાં કારકિર્દી બનાવવા માટે પ્રેરિત કરશે.