ત્રિશૂર,તા.૨૭: કેરળના ત્રિશૂર સ્‍થિત પ્રસિદ્ધ ગુરુવાયુર મંદિરમાં નિયમોના ઉલ્‍લંઘનનો એક ચોંકાવનારો કિસ્‍સો સામે આવ્‍યો છે. શ્રી કૃષ્‍ણ મંદિરના તળાવમાં એક બિન-હિન્‍દુ મહિલા વ્‍લોગરે પોતાના પગ ધોતી હોય તેવો વીડિયો રેકોર્ડ કર્યો હતો, જેના કારણે તળાવમાં શુદ્ધિકરણ વિધિ કરવામાં આવી રહી છે.

બિગ બોસના પૂર્વ સ્‍પર્ધક અને સોશિયલ મીડિયા ઈન્‍ફલુએન્‍સર જાસ્‍મીન જાફરે મંદિરના તળાવમાં પોતાના પગ ધોતી હોય તેવો વીડિયો બનાવ્‍યો હતો. આ પછી તળાવનું શુદ્ધિકરણ કરવામાં આવ્‍યું છે. ઉલ્‍લેખનીય છે કે મંદિરના તળાવમાં વીડિયો બનાવવાની મનાઈ છે. સાથે જ, બિન-હિન્‍દુઓને પણ તળાવમાં પ્રવેશવાની મંજૂરી નથી.

ગુરુવાયુર દેવસ્‍વોમ (મંદિર વ્‍યવસ્‍થાપન સમિતિ)એ જણાવ્‍યું કે જાસ્‍મીન જાફરે તળાવમાં આ પ્રકારનું કાર્ય કરીને મંદિરની પરંપરાઓનો ભંગ કર્યો અને તળાવને અપવિત્ર કર્યું. આ કારણે સવારે ૫ વાગ્‍યાથી બપોરે ૧૨ વાગ્‍યા સુધી ભક્‍તો માટે મંદિરના દર્શન બંધ કરી દેવામાં આવ્‍યા હતા. ભક્‍તોને  શુદ્ધિકરણ વિધિ પૂર્ણ થયા પછી જ નાલમ્‍બલમમાં પ્રવેશવાની મંજૂરી આપવામાં આવશે.

અધિકારીઓએ જણાવ્‍યું કે શુદ્ધિકરણ વિધિ દરમિયાન છ દિવસ સુધી પૂજા ચાલશે, જેમાં ૧૮ પૂજાઓ અને ૧૮ શીવેલી (મંદિરની પરિક્રમા વિધિ) સામેલ છે. શ્રદ્ધાળુઓને મંદિરમાં દર્શન પર લગાવવામાં આવેલા અસ્‍થાયી પ્રતિબંધોનું પાલન કરવા અપીલ કરવામાં આવી છે.

દેવસ્‍વોમ પ્રશાસક ઓબી અરુણ કુમારે આ મામલે મંદિર પોલીસમાં ફરિયાદ પણ નોંધાવી છે. તેમનો આરોપ છે કે હાઈકોર્ટે મંદિરના પ્રતિબંધિત વિસ્‍તારોમાં ફોટોગ્રાફી અને વીડિયોગ્રાફી પર પ્રતિબંધ મૂક્‍યો હતો, પરંતુ જાસ્‍મીને મંદિરના તળાવની પવિત્રતાનો ભંગ કર્યો છે. બીજી તરફ, પોલીસનું કહેવું છે કે કોર્ટના નિર્દેશ મુજબ, કેસ નોંધવામાં આવશે.

જાણવા મળ્‍યું છે કે જાસ્‍મીન જાફરે આ વીડિયો આ માટે માફી પણ માંગી હતી અને કહ્યું હતું કે તેમને આ પ્રતિબંધો વિશે જાણ ન હતી