ગુજરાતમાં બેનામી પાર્ટીઓને ૪૩૦૦ કરોડનું દાન રાહુલના ચૂંટણી પંચ પર પ્રહાર
પૈસા કયાંથી આવ્યા અને કયાં ગયા તેની તપાસ થવી જોઈએ, આ સાથે તેમણે ટોણો માર્યો કે શું ચૂંટણી પંચ નિયમો બદલશે?
નવી દિલ્હી, તા.૨૭: સમયાંતરે રાજકીય પક્ષો દ્વારા લેવામાં આવતા દાન અંગે દેશમાં હોબાળો મચ્યો છે. કયારેક દાન લેનારા રાજકીય પક્ષો કઠેડામાં હોય છે અને ઘણી વખત દાતાઓ પર પ્રશ્નો ઉભા થાય છે. દૈનિક ભાસ્કરના અહેવાલમાં ખુલાસો થયો છે કે ગુજરાતમાં ૧૦ બેનામી પાર્ટીઓને ૫ વર્ષમાં ૪૩૦૦ કરોડનું દાન મળ્યું છે. હવે રાહુલ ગાંધીએ આ અંગે ટોણો માર્યો છે.
દૈનિક ભાસ્કરના ખુલાસા પછી, રાહુલ ગાંધીએ સોશિયલ મીડિયા પ્લેટફોર્મ X પર પોસ્ટ કરીને લખ્યું, ગુજરાતમાં કેટલીક અનામી પાર્ટીઓ છે જેમના નામ કોઈએ સાંભળ્યા નથી - પરંતુ તેમને ૪૩૦૦ કરોડ રૂપિયાના દાન મળ્યા છે. આ પાર્ટીઓએ ખૂબ જ ઓછા પ્રસંગોએ ચૂંટણી લડી છે, અથવા તેમના પર ખર્ચ કર્યા છે.
તેમણે વધુમાં કહ્યું કે આ હજારો કરોડ રૂપિયા કયાંથી આવ્યા? તેમને કોણ ચલાવી રહ્યું છે? અને પૈસા કયાં ગયા? શું ચૂંટણી પંચ તપાસ કરશે - અથવા તે અહીં પણ સોગંદનામું માંગશે? અથવા તે કાયદામાં જ ફેરફાર કરશે, જેથી આ ડેટા પણ છુપાવી શકાય?
રાહુલ ગાંધી છેલ્લા ૨ મહિનાથી ચૂંટણી પંચથી ખૂબ ગુસ્સે છે. સમયાંતરે, તેઓ કમિશન વિરુદ્ધ નિવેદનો આપતા રહે છે. આ સાથે, તેઓ એવો પણ આરોપ લગાવે છે કે દેશમાં ચૂંટણી પંચ હાલમાં ભાજપ માટે કામ કરી રહ્યું છે. ગુજરાત દાન કેસમાં પણ, રાહુલ ગાંધીએ હવે બોલ ચૂંટણી પંચના કોર્ટમાં મૂકયો છે અને પ્રશ્નો ઉભા કર્યા છે કે શું ચૂંટણી પંચ આ બાબતે કોઈ કાર્યવાહી કરશે? હવે?
રાહુલ ગાંધી હાલમાં મત ચોરી અને SIR વિરુદ્ધ મતદાર અધિકાર પ્રવાસનું નેતળત્વ કરી રહ્યા છે. તેમણે ભૂતકાળમાં ચૂંટણી પંચ સામે અનેક આરોપો લગાવ્યા હતા. જેમાં તેમણે કહ્યું હતું કે પંચ ભાજપને ચૂંટણી જીતવા માટે કામ કરી રહ્યું છે.
મીડિયા અહેવાલો અનુસાર, ૨૩ લોકોએ આ ૧૦ રાજકીય પક્ષોને દાન આપ્યું છે. દાન લેનારા રાજકીય પક્ષોએ લોકસભા અને વિધાનસભા બંને ચૂંટણીઓમાં પોતાના ઉમેદવારો ઉભા રાખ્યા હતા. તેમને સમગ્ર ચૂંટણીમાં કુલ ૫૪,૦૬૯ મત મળ્યા છે.
(3:35 PM IST)
છેલ્લા 8 દિવસમાં સૌથી લોકપ્રિય 
