નવી દિલ્હી ૨૭ ઓગસ્ટ, ૨૦૨૫: દેશના મુખ્ય ન્યાયાધીશ (CJI) જસ્ટિસ બી.આર. ગવઈએ વ્યક્તિગત સ્વતંત્રતાના અધિકારને લઈને અલ્હાબાદ હાઈકોર્ટ પર ભારે નારાજગી વ્યક્ત કરી છે. એક CBI સંબંધિત કેસમાં આરોપીની જામીન અરજી ૪૩ વખત મુલતવી રાખવામાં આવતા, CJIની બેન્ચે હાઈકોર્ટની સખત શબ્દોમાં ઝાટકણી કાઢી.

શું છે સમગ્ર મામલો?
આ કેસમાં આરોપી રામનાથ મિશ્રા સાડા ત્રણ વર્ષથી વધુ સમયથી કસ્ટડીમાં છે. તેમની જામીન અરજી પર અલ્હાબાદ હાઈકોર્ટમાં વારંવાર સુનાવણી ટાળવામાં આવી રહી હતી. આ મામલો જ્યારે સુપ્રીમ કોર્ટમાં પહોંચ્યો, ત્યારે CJI જસ્ટિસ બી.આર. ગવઈ અને જસ્ટિસ એન.વી. અંજારીયાની બેન્ચે આ મામલાની ગંભીરતાને ધ્યાનમાં લીધી.

બેન્ચે પોતાના આદેશમાં સ્પષ્ટપણે કહ્યું, "વ્યક્તિગત સ્વતંત્રતા સંબંધિત મામલાઓ પર અદાલતોએ ખૂબ જ ઝડપથી વિચાર કરવો જોઈએ. આટલા લાંબા સમય સુધી કેસ પેન્ડિંગ રાખવા અને સમયાંતરે સુનાવણી મુલતવી રાખવાનું વલણ અસ્વીકાર્ય છે."

CBIની દલીલ પણ સુપ્રીમ કોર્ટે ફગાવી
CBI વતી હાજર થયેલા એડિશનલ સોલિસિટર જનરલ એસ.ડી. સંજયે જામીન અરજીનો વિરોધ કરતા કહ્યું કે જો હાઈકોર્ટમાં અરજીઓ પેન્ડિંગ હોય ત્યારે સુપ્રીમ કોર્ટ જામીન મંજૂર કરશે, તો તે એક ખોટી પ્રથા ઊભી કરશે. જોકે, સુપ્રીમ કોર્ટે આ દલીલને સ્વીકારવાની ના પાડી દીધી. કોર્ટે જણાવ્યું કે આરોપી પહેલેથી જ સાડા ત્રણ વર્ષથી કસ્ટડીમાં છે અને તેમની અરજી પર ૪૩ વખત સુનાવણી ટાળવામાં આવી છે, જે તેમની વ્યક્તિગત સ્વતંત્રતાનું ઉલ્લંઘન છે.

આ એક જ કેસમાં અગાઉ પણ ૨૨ મે, ૨૦૨૫ના રોજ સુપ્રીમ કોર્ટે સહ-આરોપીને જામીન આપ્યા હતા, જ્યારે જાણવા મળ્યું હતું કે તેની જામીન અરજી પર ૨૭ વખત સુનાવણી મુલતવી રાખવામાં આવી હતી. આ ઘટના દર્શાવે છે કે સુપ્રીમ કોર્ટ વ્યક્તિગત સ્વતંત્રતાના અધિકારને કેટલી ગંભીરતાથી લે છે અને આ મામલાઓમાં થતા વિલંબને બિલકુલ સહન કરવા તૈયાર નથી.