મુંબઈ, તા.૨૭

ગોવિંદા અને તેમના પત્ની સુનિતા આહુજાના છૂટાછેડાની અફવાનો હવે અંત આવ્યો છે. આજે બંન્નેએ તેમના ઘરે ગણપતિજીની સ્થાપના કરી હતી. બંન્ને સાથે જોવા મળ્યા અને તેમના લગ્નજીવનમાં કોઈ તકલીફ નથી તે વાત આજે તેમણે સાબિત કરી. જોકે આ અગાઉ ગોવિંદાની દીકરી ટીના આહુજાએ પણ આ વાતે પોતાની પ્રતિક્રિયા આપી હતી અને અફવા પર ધ્યાન ન આપવા જણાવ્યું હતું. આજે મીડિયા સામે સુનિતા આહુજાએ તેમના છૂટાછેડાની અફવાનો અંત લાવી દીધો છે.

સમગ્ર મામલે સુનિતાએ મીડિયાને કહ્યું જો કશું હોત તો અમે આટલા નજીક કેમ ના હોતા. અમારા સંબંધને કશું નથી થયું. સાથે જ સુનિતાએ કહ્યું કે ભગવાન આવે કે શેતાન આવે અમને કોઈ અલગ ન કરી શકે. તેણે એવું પણ કહ્યું કે મેરા પતિ સિર્ફ મેરા હૈ ફિલ્મ હતી તેમ મારો ગોવિંદા પણ માત્ર મારો છે. મીડિયાને એવું પણ કહ્યું જ્યાં સુધી અમે કશું ના બોલીએ તમે પણ કશું ન બોલશો.

સુનિતાએ વધુમાં એવું કહ્યું કે હું ઈચ્છું છું કે બધા ગણેશજીનો તહેવાર મનાવે ગણપતિ આપણા પ્રથમ દેવતા છે. તેમના આશીર્વાદથી જ દરેક નવું કાર્ય શરૃ થતું હોય છે. જેથી બધા લોકો આનંદમાં રહો અને ગણપતિનો તહેવાર મનાવો. આ સાથે જ સુનિતાએ લોકોને એવી પણ સલાહ આપી કે મોદક ઓછા ખાઓ તેનાથી વજન વધી જાય છે.

ઉલ્લેખનીય છે કે છેલ્લા કેટલાક દિવસોથી એવી અફવાએ જોર પકડ્યું હતું કે ગોવિંદા અને તેમના પત્ની સુનિતા આહુજા છૂટાછેડા લેવાના છે. જોકે આ વાતને તેમની દીકરીએ અફવા ગણાવી હતી. તો બીજી તરફ ગોવિંદા અને સુનિતા આહુજાએ આ મામલે કોઈ નિવેદન આપ્યું ન હતું. જોકે આજે બંન્ને ગણેશ ચતુર્થીએ સાથે જોવા મળ્યા અને તેમના છૂટાછેડાની અફવાનો અંત આવ્યો છે.