નવી દિલ્હી : આમ આદમી પાર્ટીના વરિષ્ઠ નેતા અને દિલ્હીના પૂર્વ મંત્રી સૌરભ ભારદ્વાજના ઘરે એન્ફોર્સમેન્ટ ડિરેક્ટોરેટ (ED) દ્વારા કરવામાં આવેલા દરોડાઓએ રાજકીય ગરમાવો વધાર્યો છે. મંગળવાર રાત્રે ૨ વાગ્યા સુધી ચાલેલી આ કાર્યવાહી બાદ ભારદ્વાજે પ્રેસ કોન્ફરન્સમાં કેટલાક આશ્ચર્યજનક અને રમૂજી ખુલાસા કર્યા.

સવારે ૭ વાગ્યાથી શરૂ થયેલી કાર્યવાહી
ભારદ્વાજે જણાવ્યું કે તેમની પુત્રી સવારે ૭:૧૫ વાગ્યે શાળાએ જવા નીકળી ત્યારે જ ED અને CRPF અધિકારીઓ તેમના ઘરે પહોંચ્યા. તેમણે કહ્યું, "મારી નાની પુત્રી નર્સરીમાં ભણે છે. મેં તેને શાળાએ મોકલી અને ઘર તપાસ માટે ખુલ્લું રાખ્યું." તેમણે આરોપ લગાવ્યો કે ED રાજકીય દબાણ હેઠળ કામ કરી રહી છે અને આ દરોડા દિલ્હીના LG વી.કે. સક્સેનાના ઈશારે તેમને ફસાવવાનું કાવતરું છે.

રાત્રે ૨ વાગ્યા સુધી દબાણ અને પૂછપરછ
ભારદ્વાજે જણાવ્યું કે સાંજે ૮ વાગ્યાથી રાત્રે ૨ વાગ્યા સુધી સતત તેમનું નિવેદન નોંધવામાં આવ્યું. તેમણે ED અધિકારીઓ પર નિવેદન બદલવા માટે દબાણ કરવાનો આરોપ મૂક્યો. "મને કહેવામાં આવ્યું કે અમે જે કહીએ તે લખો, નહીં તો જેલમાં જવું પડશે. મારું નિવેદન વારંવાર સિનિયર અધિકારીઓને મોકલવામાં આવી રહ્યું હતું અને પાછું આવતું હતું," તેમણે કહ્યું.

'પત્નીએ મજાકમાં કહ્યું, તેને લઈ જાઓ, તે ઘરે પણ નથી રહેતો'
આ ગંભીર આરોપોની વચ્ચે, ભારદ્વાજે દરોડા દરમિયાનના કેટલીક હળવી પળો પણ શેર કરી. તેમણે હસતા હસતા કહ્યું કે ED અધિકારીઓએ તેમના પરિવારને ડરાવવાનો પ્રયાસ કર્યો ત્યારે તેમની પત્નીએ મજાકમાં કહ્યું, "તેને લઈ જાઓ, તે ઘરે પણ ક્યાં રહે છે!" તેમણે ઉમેર્યું કે તેમની પુત્રીએ પણ કહ્યું, "જો તમે પપ્પાને લઈ જાઓ તો મને પણ સાથે લઈ જજો, હું શાળામાં પ્રખ્યાત થઈ જઈશ!"

ભારદ્વાજે દાવો કર્યો કે દરોડામાં ફક્ત બે વસ્તુઓ મળી છે - એક ચૂંટણી સંબંધિત સોગંદનામું અને બીજું આરોગ્ય વિભાગનો દસ્તાવેજ, જે બંને પહેલાથી જ સાર્વજનિક છે. તેમણે કહ્યું કે EDનો ઉદ્દેશ્ય વિપક્ષી નેતાઓને માનસિક રીતે દબાણ કરીને તોડવાનો છે, પરંતુ તેઓ ક્યારેય ડરશે નહીં.

આ દરોડા દિલ્હીમાં હોસ્પિટલના બાંધકામ સંબંધિત ભ્રષ્ટાચારના આરોપો સાથે જોડાયેલા છે, જેનો AAPએ હંમેશા વિરોધ કર્યો છે. આ ઘટનાએ AAP અને કેન્દ્ર સરકાર વચ્ચેના તણાવમાં વધુ વધારો કર્યો છે.