મુંબઈ : ગણેશ ચતુર્થીના પાવન અવસરે આખું મુંબઈ શહેર ગણેશમય બની ગયું છે. ઢોલ-તાશાના નાદ અને ભક્તોના જયઘોષથી વાતાવરણ ગુંજી ઉઠ્યું છે. આ તહેવારની ભવ્યતામાં સૌથી પ્રખ્યાત નામ છે, લાલબાગચા રાજા, જે માત્ર મુંબઈ જ નહીં, પરંતુ સમગ્ર વિશ્વના ભક્તો માટે આસ્થાનું કેન્દ્ર બન્યો છે.

'મન્નતોં કા રાજા'
મુંબઈના પરેલ વિસ્તારમાં સ્થિત આ પંડાલ લોકોની શ્રદ્ધા અને આસ્થાનું પ્રતીક છે. એવું માનવામાં આવે છે કે લાલબાગચા રાજા પાસે જે કોઈ પણ સાચા હૃદયથી કોઈ મનોકામના માંગે છે, તેની ઈચ્છા ચોક્કસપણે પૂરી થાય છે. આ જ કારણ છે કે તેમને પ્રેમથી 'મન્નતોં કા રાજા' પણ કહેવામાં આવે છે. આ વર્ષે પણ મોટી હસ્તીઓથી લઈને સામાન્ય ભક્તો સુધી, લાખો લોકો બાપ્પાના દર્શન કરવા માટે ઉમટી રહ્યા છે.

૯૧ વર્ષ જૂની પરંપરા
લાલબાગચા રાજા મંડળની સ્થાપના વર્ષ ૧૯૩૪માં થઈ હતી. લગભગ નવ દાયકા પહેલા, અહીંના માછીમારો અને દુકાનદારોએ બજાર માટે કાયમી જગ્યા મળે તે માટે બાપ્પાને પ્રાર્થના કરી હતી. જ્યારે તેમની ઈચ્છા પૂરી થઈ, ત્યારે કૃતજ્ઞતાના પ્રતીક તરીકે તેમણે ગણેશજીની એક નાની મૂર્તિની સ્થાપના કરી. ત્યારથી આ પરંપરા ચાલી રહી છે અને આજે ૯૧ વર્ષ પછી પણ સંપૂર્ણ શ્રદ્ધા સાથે તેનું પાલન થાય છે.

૨૨ ફૂટ ઊંચી મૂર્તિ: રામેશ્વરમની થીમ પર આધારિત
આ વર્ષે અહીં ૨૨ ફૂટ ઊંચી ગણપતિની ભવ્ય મૂર્તિ સ્થાપિત કરવામાં આવી છે. લાલબાગચા રાજા મંડળના ઉપપ્રમુખ સિદ્ધેશ કોરગાંવકરે જણાવ્યું કે, "મૂર્તિ અને તેનું ડેકોરેશન તમિલનાડુના રામેશ્વરમની થીમ પર આધારિત છે. જેમાં હનુમાનજી રામેશ્વરમથી ભગવાન શંકરની મૂર્તિ લાવતા હોય તેવું દ્રશ્ય દર્શાવવામાં આવ્યું છે."

લાંબી કતારો, અખૂટ શ્રદ્ધા
લાલબાગચા રાજાના દર્શન માટે બે મુખ્ય કતારો હોય છે. એક છે 'નવસાચી લાઈન', જ્યાં ભક્તો પોતાની કોઈ ખાસ મનોકામના સાથે બાપ્પાના ચરણોમાં જાય છે. આ લાઈનમાં ૨૫ થી ૪૦ કલાકનો સમય પણ લાગી શકે છે. બીજી 'મુખદર્શન લાઈન' છે, જ્યાં ભક્તો દૂરથી બાપ્પાના દર્શન કરી શકે છે. આ લાઈનમાં પણ ૪ થી ૫ કલાક જેટલો સમય લાગી શકે છે, જે ભક્તોની અખૂટ શ્રદ્ધા દર્શાવે છે.

ભક્તોની સુવિધા અને સુરક્ષા માટે મંડળ દ્વારા સીસીટીવી કેમેરા, હજારો પોલીસકર્મીઓ અને સ્વયંસેવકો તૈનાત કરવામાં આવ્યા છે. સાથે જ, મેડિકલ સહાય અને અન્ય સુવિધાઓ પણ ઉપલબ્ધ કરાવવામાં આવી છે. આ ગણેશ ચતુર્થી પર લાલબાગચા રાજાના દર્શને ફરી એકવાર સાબિત કરી દીધું છે કે લોકોની આસ્થા અને શ્રદ્ધા કેટલી મજબૂત છે.