નવી દિલ્હી : એક તરફ જ્યાં અમેરિકાએ ડોનાલ્ડ ટ્રમ્પના નવા ટેરિફ લાગુ કરીને ભારત સાથેના વેપાર સંબંધોમાં તણાવ વધાર્યો છે, ત્યારે બીજી તરફ ભારતીય ખાનગી અવકાશ કંપનીઓએ અમેરિકાની ધરતી પરથી જ એક ઐતિહાસિક સિદ્ધિ હાંસલ કરી છે. આ ઘટનાએ ફરી એકવાર ભારતની તકનીકી શક્તિ અને આત્મનિર્ભરતાનું પ્રદર્શન કર્યું છે.

બેંગલુરુ સ્થિત પિક્સલ અને હૈદરાબાદ સ્થિત ધ્રુવ સ્પેસ એ કેલિફોર્નિયાના વેન્ડેનબર્ગ સ્પેસ ફોર્સ બેઝથી એલોન મસ્કની કંપની સ્પેસએક્સના ફાલ્કન-૯ રોકેટ દ્વારા તેમના ઉપગ્રહોને સફળતાપૂર્વક અવકાશમાં લોન્ચ કર્યા છે.

પિક્સલના 'ફાયરફ્લાય' કૃષિ ક્રાંતિ લાવશે!
પિક્સલે તેના ત્રણ નવા ફાયરફ્લાય ઉપગ્રહો લોન્ચ કર્યા છે, જેની સાથે કંપની પાસે હવે કુલ છ સક્રિય ફાયરફ્લાય ઉપગ્રહો છે. આ ભારતની કોઈપણ ખાનગી કંપનીનું સૌથી મોટું અર્થ-ઇમેજિંગ સેટેલાઇટ ગ્રુપ છે.

આ ઉપગ્રહો ખાસ કરીને ખેડૂતો અને કૃષિ ક્ષેત્ર માટે વરદાન સાબિત થશે. દરેક ફાયરફ્લાય હાઈપરસ્પેક્ટ્રલ સેન્સરથી સજ્જ છે, જે ૧૩૫થી વધુ સ્પેક્ટ્રલ બેન્ડમાં પાંચ મીટરના રિઝોલ્યુશનવાળી તસવીરો લઈ શકે છે. આનાથી કૃષિમાં પાકની સ્થિતિ, પ્રદૂષણ અને ગેસ લીકેજ જેવી બાબતોની સચોટ માહિતી મળી શકશે. પિક્સલના સીઈઓ અવૈસ અહેમદે જણાવ્યું કે, "હવે અમારી તસવીરો પૃથ્વીનો એક સતત રેકોર્ડ હશે. તે પૃથ્વીને એક જીવંત પ્રયોગશાળા બનાવશે."

ધ્રુવ સ્પેસ: વૈશ્વિક બજારમાં ભારતનું સ્થાન
બીજી તરફ, ધ્રુવ સ્પેસએ તેનો LEAP-૧ ઉપગ્રહ લોન્ચ કરીને વૈશ્વિક બજારમાં પ્રવેશ કર્યો છે. આ એક 'હોસ્ટેડ પેલોડ મિશન' છે, જેનો અર્થ છે કે હવે કંપની આંતરરાષ્ટ્રીય ગ્રાહકો માટે ઉપગ્રહો પર તેમના સાધનો લઈ જવાની સુવિધા પૂરી પાડશે. સીઈઓ સંજય નેક્કંતીના જણાવ્યા મુજબ, "આ મિશન ભારત અને ઓસ્ટ્રેલિયા વચ્ચે ભાગીદારીનું પ્રતીક છે અને વૈશ્વિક અવકાશ અર્થતંત્રમાં નવી તકો ઊભી કરશે."

આત્મનિર્ભર ભારતની નવી ઓળખ
એક જ રોકેટ પર બે ભારતીય સ્ટાર્ટઅપ્સની આ સફળતા દર્શાવે છે કે ભારત હવે માત્ર અવકાશ મિશનો લોન્ચ કરનાર દેશ નથી, પરંતુ અવકાશ ઉકેલોના વૈશ્વિક પ્રદાતા તરીકે ઉભરી રહ્યું છે. આ સિદ્ધિઓ સાથે ભારતના ખાનગી અવકાશ સ્ટાર્ટઅપ્સે નવી ઊંચાઈઓ હાંસલ કરી છે, અને આ માત્ર શરૂઆત છે.