GST કાઉન્સિલ ૩૧ ઓક્ટોબર સુધીમાં કમ્પનસેશન સેસ નાબૂદ કરી શકે
GSTથી રાજ્યોની આવક ઘટવાની આશંકાના ઉકેલ તરીકે આ સેસ લેવાય છે
નવી દિલ્હી,તા.૨૮: ગૂડ્સ એન્ડ સર્વિસ ટેક્સ કાઉન્સિલરની આગામી બેઠક ૩ સપ્ટેમ્બરે યોજાવાની છે. આ બેઠકમાં ૩૧ ઓક્ટોબર સુધીમાં કમ્પેનસેશન (વળતર) સેસ નાબૂદ કરવા નિર્ણય લેવાઈ શકે છે. પૂર્વ નિર્ધારિત આયોજન મુજબ આ સેસ ૩૧ માર્ચ, ૨૦૨૬ સુધી વસૂલવાની હતી. જો કે રાજ્યોએ કોરોના દરમિયાન લીધેલી લોનની ચુકવણી પૂરી થવાની તૈયારીમાં છે ત્યારે આ સેસ પણ સમયમર્યાદા કરતાં વધુ પહેલા નાબૂદ થઈ શકે છે.
કોરોના દરમિયાન આવકમાં ઘટાડો થતાં રાજ્યોએ કેન્દ્ર પાસેથી લોન લીધી હતી. ૧૮ ઓક્ટોબર સુધીમાં આ લોનની પુનઃચૂકવણી થઈ જવાની શક્યતા છે. આમ છતાં, કામગીરીની સરળતા માટે સરકાર દ્વારા તેને ઓક્ટોબરના અંત સુધી યથાવત રાખવામાં આવશે. સત્તાવાર સૂત્રોના જણાવ્યા મુજબ, સેસ કલેક્શનમાં ૨૦૦૦-૩૦૦૦ કરોડની વધુ આવક થઈ છે, જેને રાજ્યો અને કેન્દ્ર વચ્ચે સરખા ભાગે વહેંચવામાં આવશે.
વર્ષ ૨૦૧૭માં જીએસટીનો અમલ શરૂ થયો ત્યારે રાજ્યોને કરની આવકમાં ઘટાડો થવાની ચિંતા હતી. રાજ્યોની આ ચિંતા દૂર કરવા માટે કમ્પેનસેશન સેસને પાંચ વર્ષ માટે લાગુ કરાઈ હતી. કેન્દ્ર સરકારે રાજ્યો માટે રૂ.૨.૬૯ લાખનું ઋણ લીધુ હતું અને રાજ્યોને આર્થિક સહાય પૂરી પાડી હતી. દરમિયાન કોરોના મહામારીનું આગમન થયું અને સરકારની આવકોમાં તોતિંગ ઘટાડો આવ્યો હતો. જેના કારણે કમ્પેનસેશન સેસની મુદત વધારવાનો નિર્ણય જૂન ૨૦૨૨માં લેવાયો હતો અને સેસ માર્ચ ૨૦૨૬ સુધી વસૂલવાની જાહેરાત થઈ હતી.
જીએસટી એક્ટની જોગવાઈ મુજબ, રાજ્યોની લોનની ચૂકવણી થઈ જાય ત્યારે કમ્પેનસેશન સેસ નાબૂદ કરવાની છે. ૧૮ ઓક્ટોબર સુધીમાં રાજ્યોની લોનની પુનઃચૂકવણી થઈ જવાનું અનુમાન છે ત્યારે આ સેસ પણ નવેમ્બર મહિનાથી નાબૂદ થઈ જશે.(૪૦.૧૧)
(9:44 AM IST)
છેલ્લા 8 દિવસમાં સૌથી લોકપ્રિય 
