નવી દિલ્‍હી તા.૨૮: ફેડરેશન ઓફ સ્‍વીટ્‍સ એન્‍ડ નમકીન મેન્‍યુફેક્‍ચરર્સે માંગ કરી છે કે નમકીન પર ગુડ્‍સ એન્‍ડ સર્વિસ ટેક્‍સ (GST) ૧૨% થી ઘટાડીને ૫% કરવામાં આવે. આ ઉપરાંત, ફેડરેશન દ્વારા ચાટ અને રેસ્‍ટોરન્‍ટમાં ખાદ્ય પદાર્થો વેચતી મીઠાઈની દુકાનો પર ઇનપુટ ટેક્‍સ ક્રેડિટ (ITC) સાથે ૫% ટેક્‍સ લાદવાની વિનંતી કરવામાં આવી છે.

ફેડરેશન દ્વારા તેની નોંધમાં કહેવામાં આવ્‍યું છે કે આ ફેરફારોથી મુકદ્દમામાં ઘટાડો થશે, માર્જિન સ્‍થિર રહેશે, રોજગારીની તકો વધશે અને તે ભારતની વૈશ્વિક ફૂડ હબ બનવાની મહત્‍વાકાંક્ષા સાથે પણ સુસંગત રહેશે. તેમાં કહેવામાં આવ્‍યું છે કે હાલમાં ખાદ્ય પદાર્થોને હાલના તમામ GST સ્‍લેબમાં વહેંચવામાં આવ્‍યા છે.

ફેડરેશનના ડિરેક્‍ટર જનરલ ફિરોઝ એચ નકવીએ જણાવ્‍યું હતું કે, 'હાલમાં મલબારી પરાઠા પર ૧૮ ટકા, રોટલી અને ચપાતી પર ૫ ટકા અને બ્રેડ પર કરમુક્‍તિ છે. નોન-બ્રાન્‍ડેડ નમકીન પર ૫ ટકા, જ્‍યારે બ્રાન્‍ડેડ નમકીન પર ૧૨ ટકા જીએસટી લાગે છે. મીઠાઈની દુકાનોમાં ખાવામાં આવતી રસગુલ્‍લા અથવા જલેબી પર ITC વગર ૫ ટકા કર લાગે છે અને ઘરે લઈ જવા પર પણ ITC સાથે ૫ ટકા કર લાગે છે. લગભગ આ જ પરિસ્‍થિતિ મીઠાઈઓ પર પણ લાગુ પડે છે.'

નકવીએ કહ્યું, વિવિધ શ્રેણીઓના ઉત્‍પાદનોમાં આવી વિસંગતતાઓને કારણે, વર્ગીકરણ વિવાદો, પાલનનો બોજ વધ્‍યો છે અને મુકદ્દમા પણ સતત વધી રહ્યા છે. આને કારણે, ભારતીય ફૂડ પ્રોસેસિંગ ઉદ્યોગમાં નાના અને મધ્‍યમ ઉદ્યોગપતિઓ સૌથી વધુ પીડાઈ રહ્યા છે.

અરજીમાં એમ પણ કહેવામાં આવ્‍યું છે કે રેસ્‍ટોરન્‍ટ સેવાઓ પર ITC સાથે ૫ ટકા GST અને શોરૂમ વેચાણ પર ITC સાથે ૫, ૧૨ અને ૧૮ ટકા GST લાગુ પડે છે. નકવીએ કહ્યું, બંને કામગીરીમાં રસોડું, સ્‍ટાફ, ઉપયોગિતાઓ અને ભાડું જેવા સમાન માળખાકીય સુવિધાઓ હોવાથી, ઇનપુટ ખર્ચને અલગ કરવો લગભગ અશક્‍ય છે. પરિણામે, વ્‍યવસાયોને બે રેકોર્ડ જાળવવા પડે છે, જે સંચાલન ખર્ચમાં વધારો કરે છે અને મુકદ્દમાનું જોખમ વધારે છે.(૩૮.૫)