નવી દિલ્હી : રાષ્ટ્રીય સ્વયંસેવક સંઘ (આરએસએસ)ના પ્રમુખ મોહન ભાગવતે સ્પષ્ટ કર્યું છે કે ભાજપના નિર્ણયો આરએસએસ દ્વારા લેવામાં આવતા નથી, અને બંને સંગઠનો વચ્ચે કોઈ મતભેદ નથી. તેમણે જણાવ્યું કે આરએસએસ ફક્ત માર્ગદર્શન આપે છે, જ્યારે રાજકીય નિર્ણયો લેવાની જવાબદારી પક્ષના નેતૃત્વની હોય છે.
 
"અમે સલાહ આપીએ છીએ, નિર્ણય નહીં"
આરએસએસ શતાબ્દી વ્યાખ્યાન શ્રેણીના ત્રીજા દિવસે મોહન ભાગવતે કહ્યું કે, "આરએસએસ બધું જ નક્કી કરે છે, આ સંપૂર્ણપણે ખોટું છે. સંઘ ભાજપ સંબંધિત નિર્ણયો લેતું નથી. દરેક સંગઠનની પોતાની કાર્યપ્રણાલી હોય છે." તેમણે વધુમાં જણાવ્યું કે, "અમારામાં મતભેદો હોઈ શકે છે, પરંતુ કોઈ દુશ્મનાવટ નથી... આવું ન થઈ શકે."

ભાગવતે જણાવ્યું કે તેઓ ૫૦ વર્ષથી આરએસએસની શાખાઓ ચલાવી રહ્યા છે, અને તેમની કુશળતા તે ક્ષેત્રમાં છે. જ્યારે સરકાર ચલાવવાની કુશળતા ભાજપના નેતાઓ પાસે છે. તેઓ ફક્ત સલાહ આપે છે, અને સરકાર પોતાના કામ કરે છે.
 
સરકારી પ્રણાલીમાં બદલાવની જરૂર
ભાગવતે એ પણ કહ્યું કે હાલની સરકારી પ્રણાલી અંગ્રેજો દ્વારા શાસન કરવા માટે બનાવવામાં આવી હતી, અને તેમાં કેટલાક ફેરફારો કરવાની જરૂર છે. તેમણે કહ્યું કે તેઓ ઈચ્છે છે કે કેટલાક કામ થાય, પરંતુ ખુરશી પર બેઠેલી વ્યક્તિએ તે કામ કરવું પડે છે અને તે જાણે છે કે માર્ગમાં શું અવરોધો છે. "આપણે તેને તે સ્વતંત્રતા આપવી જોઈએ. ક્યાંય કોઈ સંઘર્ષ નથી," તેમણે ભારપૂર્વક જણાવ્યું.

આ નિવેદનોએ ભાજપ અને આરએસએસ વચ્ચેના સંબંધો અંગેની અટકળો પર પૂર્ણવિરામ મૂક્યો છે.