ટ્રમ્પે ઈન્ડિયા પર ટેરિફ નાખ્યા બાદ અમેરિકામાં શું-શું મોંઘું થવાનું છે?
અમેરિકામાં રહેતા ઈન્ડિયન્સને હવે ઈન્ડિયન ગ્રોસરી માટે વધારે પૈસા ચૂકવવા પડી શકે છે, તેવી જ રીતે અમેરિકામાં કપડાંથી લઈને ઈન્ડિયાથી આવતી બીજી ઘણી ચીજવસ્તુઓના ભાવમાં મોટો વધારો થવાની શક્યતા છે
ન્યુયોર્કતા.૨૮: અમેરિકામાં રહેતા ઈન્ડિયન્સને હવે ઈન્ડિયન ગ્રોસરી માટે વધારે પૈસા ચૂકવવા પડી શકે છે, તેવી જ રીતે અમેરિકામાં કપડાંથી લઈને ઈન્ડિયાથી આવતી બીજી ઘણી ચીજવસ્તુઓના ભાવમાં મોટો વધારો થવાની શક્યતા છે. ડોનલ્ડ ટ્રમ્પે ઈન્ડિયા પર લગાવેલો ટેરિફ ઓગસ્ટ ૨૭થી લાગુ થઈ ચૂક્યો છે અને ઈન્ડિયામાં તો તેની અસરો દેખાવવાની પણ શરૂ થઈ ગઈ છે.
અમેરિકાના ઈમ્પોર્ટર્સ ૩૦ ટકા જેટલું ડિસ્કાઉન્ટ માગી રહ્યા હોવાથી ઈન્ડિયાથી યુએસ જતાં ગારમેન્ટ્સનું મેન્યુફેક્ચરિંગ અટકાવી દેવામાં આવ્યું છે અને તેની સાથે-સાથે ૮૦૦ ડોલરથી ઓછી વેલ્યૂ ધરાવતા સામાનને અગાઉ કસ્ટમ ડ્યૂટી ભરવામાંથી અપાયેલી મુક્તિ પણ પાછી ખેંચી લેવામાં આવી હોવાના કારણે ઈન્ડિયાથી પોસ્ટલ કન્સાઈનમેન્ટસને અમેરિકા મોકલવાનું પણ બંધ કરી દેવામાં આવ્યું છે.
ટેરિફને લીધે ઈન્ડિયાના બિઝનેસિસને તો નુક્સાન થઈ જ રહ્યું છે પરંતુ તેની અસર અમેરિકાના કસ્ટમર્સ પર પણ પડ્યા વિના નથી રહેવાની કારણકે ટેરિફથી યુએસને ભલે જંગી આવક થાય પરંતુ તેનો આખરી બોજ તો અમેરિકાના લોકો પર જ પડવાનો છે. હાલ અમેરિકાએ સૌથી વધુ ટેરિફ ઈન્ડિયા પર લગાવ્યો છે અને તેના માટે એવું કારણ અપાયું છે કે ઈન્ડિયા રશિયા પાસેથી ક્રુડ ખરીદે છે અને તેના કારણે રશિયાને યુક્રેન સામે લડવા માટે આર્થિક તાકાત મળે છે. અમેરિકાએ ૨૦૨૪માં ઈન્ડિયાથી ૮૫ બિલિયન ડોલરનો માલ આયાત કર્યો હતો, જ્યારે અમેરિકાની ૬૫ ટકા જેટલી લાર્જ કંપનીઓ ઈન્ડિયામાં કામકાજ ધરાવે છે, જેમકે એપલ હાલ અમેરિકામાં વેચાતા મોટાભાગના આઈફોન્સ ઈન્ડિયામાં જ પ્રોડ્યૂસ કરે છે.
ગ્લોબલ ટ્રેડ રિસર્ચ ઈનિશિએટિવના એક રિપોર્ટમાં જણાવાયા અનુસાર ટેરિફને કારણે નાણાકીય વર્ષ ૨૦૨૬માં ઈન્ડિયાથી અમેરિકામાં જે એક્સપોર્ટ થશે તે ઘટીને ૫૦ બિલિયન ડોલરની નીચે આવી જશે. ટેરિફ લાગુ થાય તે પહેલા જ જાન્યુઆરીથી જૂનના ગાળામાં અમેરિકાએ ઈન્ડિયાથી ૫૬ બિલિયન ડોલરનો માલ મગાવી લીધો હતો. જોકે, ટેરિફ લાગુ થયા બાદ હાલ પૂરતો બંને દેશ વચ્ચેનો વેપાર જાણે થંભી ગયો હોય તેવી સ્થિતિ છે. અમેરિકામાં ખવાતા જિંગા એટલે કે શ્રિમ્પ ઈન્ડિયાથી જાય છે અને ખાસ તો સાઉથ ઈન્ડિયાથી મોટાપાયે જિંગા અમેરિકા મોકલવામાં આવે છે, પરંતુ હાલ શ્રિમ્પ ફાર્મર્સ કફોડી સ્થિતિમાં આવી ગયા છે.
તો બીજી તરફ અમેરિકાએ ઈન્ડિયાને બદલે ઈક્વાડોર, ઈન્ડોનેશિયા અને વિયેતનામ જેવા દેશોમાંથી જિંગા મગાવવાના પ્રયાસ શરૂ કર્યા છે. અમેરિકામાં ઈન્ડિયન્સની વસ્તી લાખોમાં છે અને યુએસમાં ઈન્ડિયન મરી-મસાલાની પણ સારી એવી ડિમાન્ડ છે, ૨૦૨૪ અને ૨૦૨૫માં ઈન્ડિયાથી અમેરિકા મસાલા એક્સપોર્ટ કરવાનું પ્રમાણ ૧૭ ટકા વધ્યું હતું પરંતુ ટેરિફને કારણે હવે તેની નિકાસ પર પણ સીધી અસર થઈ શકે છે. અમેરિકન કંપનીઓ હવે બાસમતી ચોખા માટે ઈન્ડિયાને બદલે પાકિસ્તાન, મરી-મસાલા માટે વિયેતનામ અને ચા માટે શ્રીલંકા પર નજર કરી રહી છે. જોકે, તેમ છતાંય અમેરિકામાં આ તમામ ચીજવસ્તુના ભાવ વધવાની પૂરી શક્યતા છે.
ખાવાપીવાની વસ્તુઓ ઉપરાંત ઈન્ડિયાની ટેક્સટાઈલ, જેમ્સ એન્ડ જ્વેલરી તેમજ ગારમેન્ટ અને ફુટવેર ઈન્ડસ્ટ્રી માટે પણ અમેરિકા ખૂબ જ મોટું માર્કેટ છે અને આ વસ્તુઓ ઈન્ડિયાથી જે અલગ-અલગ દેશોમાં નિકાસ થાય છે તેમાં ૩૫ ટકા માલ માત્ર અમેરિકા જાય છે તેવું ગ્લોબલ ટ્રેડ રિસર્ચનું કહેવું છે. આ બિઝનેસિસ સાથે સંકળાયેલા લોકોનું એવું પણ કહેવું છે કે નિકાસ પર અસર થવાથી ઈન્ડિયામાં પ્રોડક્શન પ્રભાવિત થશે અને તેના કારણે લોકોની રોજગારી છીનવાશે. અધૂરામાં પૂરું ઈન્ડિયામાં ફેસ્ટિવ સીઝન નજીકમાં છે તેવામાં લોકોની દિવાળી બગડે તેવી પણ આશંકા છે.
સુરતની ડાયમંડ ઈન્ડસ્ટ્રીની જ વાત કરીએ તો છેલ્લા ઘણા સમયથી મંદીમાંથી પસાર થઈ રહેલા હીરા ઉદ્યોગ માટે ૫૦ ટકા ટેરિફને કારણે પડતા પર પાટું પડ્યા જેવી સ્થિતિ સર્જાશે અને અનેક વર્કર્સને નોકરી ગુમાવવી પડશે. ઈન્ડિયાના ઓપ્શન તરીકે હવે જેમ્સ એન્ડ જ્વેલરી માટે અમેરિકા ઈઝરાયેલ તેમજ બેલ્જિયમ પર જ્યારે ગાર્મેન્ટ્સ માટે બાંગ્લાદેશ અને વિયેતનામ પર નજર કરી શકે છે. આમ તો આ દેશો પર પણ ટ્રમ્પે ટેરિફ નાખ્યા છે પરંતુ તે ઈન્ડિયા કરતા ઘણા ઓછા છે.
તો બીજી તરફ અમેરિકામાં છેલ્લા કેટલાક સમયથી ગાર્મેન્ટ્સના ભાવ વધી રહ્યા છે અને ઈન્ડિયા પર નખાયેલા ટેરિફને કારણે તેમાં હજુય વધારો થઈ શકે છે. અત્યારસુધી એવું જોવા મળ્યું છે કે ટેરિફ લાગુ થાય તે પહેલા જ અમેરિકાના ઈમ્પોર્ટર્સ મોટી માત્રામાં ચીજવસ્તુઓ મગાવી લેતા હોવાથી એકાદ મહિના સુધી ટેરિફની અસર નથી દેખાતી હોતી પરંતુ પછી ભાવવધારો થવાનું શરૂ થઈ જાય છે. જોકે, યુએસમાં ગ્રોસરી સહિતની વસ્તુઓના ભાવ છેલ્લા છ મહિનાથી વધી જ રહ્યા છે અને હવે ઈન્ડિયા પર લગાવાયેલા ટેરિફને કારણે સ્થિતિ વધુ વણસી શકે છે.(૩૮.૩)
(9:39 AM IST)
છેલ્લા 8 દિવસમાં સૌથી લોકપ્રિય 
