દરભંગા, બિહાર: બિહારના દરભંગા જિલ્લામાં રાજકીય વાતાવરણ ગરમાયું છે. કોંગ્રેસ નેતા રાહુલ ગાંધીની 'મતદાર અધિકાર યાત્રા' દરમિયાન વડાપ્રધાન નરેન્દ્ર મોદી વિરુદ્ધ અપમાનજનક ટિપ્પણી કરવા બદલ પોલીસે તાત્કાલિક કાર્યવાહી કરીને એક યુવકની ધરપકડ કરી છે. આરોપીની ઓળખ રિઝવી ઉર્ફે રાજા (૨૦) તરીકે થઈ છે, જેણે કોંગ્રેસના મંચ પરથી આ અપમાનજનક શબ્દોનો ઉપયોગ કર્યો હતો.

પોલીસની તાત્કાલિક કાર્યવાહી
આ ઘટના સિમરી પોલીસ સ્ટેશન વિસ્તારના બિથૌલી ચોકમાં બની હતી, અને તેનો વિડીયો સોશિયલ મીડિયા પર વાયરલ થયા બાદ પોલીસે ગંભીરતાથી આ મામલો લીધો. સિમરી પોલીસ સ્ટેશનમાં કેસ નંબર ૨૪૩/૨૫ નોંધવામાં આવ્યો હતો અને મોડી રાત્રે આરોપીની ધરપકડ કરવામાં આવી હતી. પોલીસ અધિકારીઓએ જણાવ્યું કે, "કોઈ પણ કાયદાથી ઉપર નથી, પછી ભલે તે રાજકીય પક્ષ સાથે સંકળાયેલ હોય કે સામાન્ય નાગરિક."

નીતિશ કુમારે પણ કરી નિંદા
આ ઘટનાની મુખ્યમંત્રી નીતિશ કુમારે પણ સોશિયલ મીડિયા પર સખત નિંદા કરી છે. તેમણે લખ્યું, "દરભંગામાં મતદાર અધિકાર યાત્રા દરમિયાન કોંગ્રેસ અને આરજેડીના મંચ પરથી માનનીય વડાપ્રધાન શ્રી નરેન્દ્ર મોદીજી અને તેમની સ્વર્ગસ્થ માતા વિરુદ્ધ જે પ્રકારની અપશબ્દોનો ઉપયોગ કરવામાં આવ્યો છે તે અત્યંત અભદ્ર છે અને હું તેની નિંદા કરું છું."

ભાજપ આક્રમક
આ સમગ્ર ઘટનાએ બિહારના રાજકારણમાં હલચલ મચાવી દીધી છે. ભાજપ આ મુદ્દે આક્રમક બન્યું છે અને કોંગ્રેસ તેમજ આરજેડી પર પ્રહારો કરી રહ્યું છે. ભાજપના નેતાઓનું કહેવું છે કે વડાપ્રધાન માટે આવી ભાષાનો ઉપયોગ કરવો એ લોકશાહીનું અપમાન છે. આ મામલે ડેપ્યુટી સીએમ સમ્રાટ ચૌધરીએ પણ વિપક્ષી પાર્ટીઓની ભાષા અને સંસ્કૃતિ પર સવાલો ઉઠાવ્યા છે.

• રાહુલ ગાંધીની યાત્રા: બુધવારે દરભંગામાં કોંગ્રેસ નેતા રાહુલ ગાંધીની 'મતદાર અધિકાર યાત્રા' ચાલી રહી હતી.

• વિવાદિત ભાષા: યાત્રા દરમિયાન કેટલાક નેતાઓ અને કાર્યકરોએ મોદી વિરોધી નારા લગાવ્યા હતા અને વાંધાજનક શબ્દોનો ઉપયોગ કર્યો હતો.

• મહામંથન: આ ઘટનાએ રાજકીય પક્ષો વચ્ચેની શાબ્દિક લડાઈને વધુ તીવ્ર બનાવી છે.