પટણા : બિહારમાં ચૂંટણી પહેલા આતંકવાદી હુમલાના ભય વચ્ચે, હવે પટના સિવિલ કોર્ટને બોમ્બથી ઉડાવી દેવાની ધમકી મળી છે. ધમકીભર્યા ઈમેલ મળ્યા બાદ સિવિલ કોર્ટમાં ગભરાટ ફેલાયો છે. મેલમાં ઉલ્લેખ છે કે કોર્ટ રૂમ અને કોર્ટ પરિસરમાં 4 RDX મૂકવામાં આવ્યા છે.

ધમકીભર્યા ઈમેલ મળ્યા બાદ, સમગ્ર કોર્ટ પરિસર ખાલી કરાવી દેવામાં આવ્યું છે. બધા જજો અને વકીલોને કોર્ટ પરિસરમાંથી બહાર કાઢવામાં આવ્યા છે. બોમ્બ ડિસ્પોઝલ સ્ક્વોડ અને ડોગ સ્ક્વોડ ટીમ દ્વારા સમગ્ર કોર્ટ પરિસરની તપાસ કરવામાં આવી રહી છે. ધમકીભર્યો ઈમેલ ગુરુવાર, 28 ઓગસ્ટના રોજ આવ્યો હતો. આમાં 29 ઓગસ્ટના રોજ પટના સિવિલ કોર્ટને RDXથી ઉડાવી દેવાની ધમકી આપવામાં આવી હતી.

ન્યાયાધીશના રૂમમાં RDX મૂકવાની ધમકી
મેઇલમાં ન્યાયાધીશને કોર્ટની બહાર લઈ જવાનો સમય પણ ઉલ્લેખ કરવામાં આવ્યો હતો. ધમકીભર્યા ઇમેઇલમાં કહેવામાં આવ્યું હતું કે, કોર્ટ પરિસરમાં RDX વિસ્ફોટકો સાથે 4 IED બોમ્બ મૂકવામાં આવ્યા છે. શુક્રવારે બપોરે 2 વાગ્યા સુધીમાં ન્યાયાધીશને બહાર કાઢો. સિવિલ કોર્ટના રજિસ્ટ્રારના નિર્દેશ પર, સરકારી વકીલ રાકેશ કુમારે તમામ વકીલોને સુરક્ષિત રીતે બહાર નીકળવાનો આદેશ આપ્યો હતો. પોલીસ અને તપાસ એજન્સીઓ ઘટનાસ્થળે પહોંચી ગઈ છે અને મામલાની તપાસ શરૂ કરી દીધી છે.

ધમકીભર્યો ઇમેઇલ દ્રવિડિયન મોડેલ ક્લબના નિવેથા પેથુરાજ ઉધયનિધિના નામે આવ્યો હતો. મેઇલમાં એમ પણ કહેવામાં આવ્યું હતું કે, 'બિહારથી તમિલનાડુ આવતા સ્થળાંતરિત મજૂરોની સંખ્યામાં વધારો થવાને કારણે તમિલનાડુની સ્થાનિક વસ્તી રચના પ્રભાવિત થઈ રહી છે. ન્યાયાધીશના રૂમમાં અને કોર્ટ પરિસરમાં 4 RDX IED લગાવવામાં આવ્યા છે. આ પાકિસ્તાનની ગુપ્તચર એજન્સી ISI ની મદદથી કરવામાં આવ્યું છે. બિહારી શ્રમિક ચેન્નાઈ યોજનાને તાત્કાલિક બંધ કરો. આજનો RDX વિસ્ફોટ બધા તમિલો તરફથી સંદેશ હશે'.

કોર્ટ પરિસરની સુરક્ષા વધારી
પટણા પોલીસે જણાવ્યું કે આ અંગે માહિતી મળતા જ કોર્ટ પરિસરની સુરક્ષા વધારી દેવામાં આવી છે અને સઘન સર્ચ ઓપરેશન ચાલુ છે. હાલમાં તપાસ દરમિયાન કોર્ટ પરિસરમાંથી કંઈ મળ્યું નથી. કોર્ટમાં આવતા અને જતા લોકોની પણ કડક તપાસ કરવામાં આવી રહી છે.