નવી દિલ્હી: યુએસ રાષ્ટ્રપતિ ડોનાલ્ડ ટ્રમ્પના વેપાર સલાહકાર પીટર નાવારોએ ફરી એકવાર ભારત વિરુદ્ધ પાયાવિહોણા અને ગંભીર આરોપો લગાવ્યા છે. નાવારોએ યુક્રેન યુદ્ધને ભારત દ્વારા રશિયા પાસેથી ક્રૂડ ઓઇલની ખરીદી સાથે સીધો જોડ્યો છે. તેમણે દાવો કર્યો છે કે યુક્રેનમાં શાંતિનો માર્ગ નવી દિલ્હીમાંથી પસાર થાય છે, કારણ કે ભારત રશિયાને આર્થિક મદદ કરી રહ્યું છે. 
ભારતીય રિફાઇનરીઓ પર ‘મની લોન્ડરિંગ’નો આરોપ
નાવારોએ X (અગાઉ ટ્વિટર) પર એક લાંબી પોસ્ટમાં ભારત પર ગંભીર આરોપો લગાવતા કહ્યું કે, "આ ફક્ત ભારતના અન્યાયી વેપાર વિશે નથી, તે પુતિનના યુદ્ધ મશીનને ભારત દ્વારા આપવામાં આવેલી નાણાકીય જીવનરેખાને કાપી નાખવા વિશે છે."
તેમણે આરોપ લગાવ્યો કે ભારતીય રિફાઇનરીઓ રશિયા સાથે મળીને સસ્તું તેલ ખરીદે છે, તેને રિફાઇન કરે છે અને આંતરરાષ્ટ્રીય બજારમાં ઊંચા ભાવે વેચીને મોટો નફો કમાય છે. આ પ્રવૃત્તિને તેમણે 'મની લોન્ડરિંગ' ગણાવી અને દાવો કર્યો કે આનાથી રશિયાને યુદ્ધ માટે ભંડોળ મળે છે. નાવારોએ કહ્યું કે યુક્રેનિયનો મરી રહ્યા છે જ્યારે ભારત રશિયન તેલમાંથી ઘણા પૈસા કમાઈ રહ્યું છે. 
વેપાર અસમાનતા અને ૫૦% ટેરિફનો બચાવ
નાવારોએ યુએસ અને ભારત વચ્ચેની વેપાર ખાધ પર પણ વાત કરી. તેમણે કહ્યું કે અમેરિકન ગ્રાહકો ભારતીય માલ ખરીદે છે, પરંતુ ભારત ઊંચા ટેરિફ લાદીને અમેરિકાથી માલની આયાત કરતું નથી, જેના કારણે અમેરિકાને ૫૦ અબજ ડોલરની વેપાર ખાધ થઈ રહી છે.
તેમણે ૨૭ ઓગસ્ટથી ભારત પર લાગુ કરાયેલા ૫૦% ટેરિફનો પણ બચાવ કર્યો, જેમાં ૨૫% અન્યાયી વેપાર માટે અને ૨૫% રાષ્ટ્રીય સુરક્ષા માટે છે. નાવારોએ ભારપૂર્વક કહ્યું કે જો ભારત યુએસના વ્યૂહાત્મક ભાગીદાર તરીકે વર્તવા માંગે છે, તો તેણે તેવું વર્તન કરવું પડશે.