પટણા: બિહારની રાજધાની પટણામાં શુક્રવારે રાજકીય હિંસાનો માહોલ જોવા મળ્યો, જ્યારે ભાજપ અને કોંગ્રેસના કાર્યકરો વચ્ચે મોટો ઘર્ષણ થયો. આ ઘટના, રાહુલ ગાંધીની તાજેતરની 'મતાધિકાર યાત્રા' દરમિયાન વડાપ્રધાન નરેન્દ્રભાઈ  મોદી અને તેમની માતા વિરુદ્ધ કરવામાં આવેલી વાંધાજનક ટિપ્પણીઓ બાદ બની હતી. આ મામલે પોલીસે એક આરોપીની ધરપકડ પણ કરી છે.
    ભાજપના કાર્યકરોએ કોંગ્રેસ કાર્યાલય પર શાંતિપૂર્ણ વિરોધ પ્રદર્શન કરવાનો દાવો કર્યો હતો, પરંતુ પરિસ્થિતિ ઝડપથી વણસી. કોંગ્રેસના આરોપ મુજબ, ભાજપના કાર્યકરોએ કાર્યાલયમાં ઘૂસીને તોડફોડ કરી અને વાહનોને નુકસાન પહોંચાડ્યું. સામે પક્ષે, ભાજપે કહ્યું કે કોંગ્રેસના કાર્યકરોએ અંદરથી ઇંટો અને પથ્થર ફેંક્યા, જેના કારણે તેઓ ગુસ્સે ભરાયા.
આ ઘટનાના વિડીયો ફૂટેજમાં બંને પક્ષના કાર્યકરો એકબીજા પર લાકડીઓ અને પથ્થરોથી હુમલો કરતા સ્પષ્ટપણે જોવા મળે છે.
 આ ઘટના પછી, કોંગ્રેસ સાંસદ રાહુલ ગાંધીએ સોશિયલ મીડિયા પ્લેટફોર્મ X પર પોતાની પ્રતિક્રિયા આપી. તેમણે લખ્યું, "સત્ય અને અહિંસા સામે અસત્ય અને હિંસા ટકી શકતી નથી. ગમે તેટલું મારો અને તોડો, અમે સત્ય અને બંધારણનું રક્ષણ કરતા રહીશું. સત્યમેવ જયતે."
આ હિંસાની નિંદા કરતા બિહાર સરકારના મંત્રી અશોક ચૌધરી (જનતા દળ યુનાઇટેડ) એ કહ્યું કે, "કોઈપણ પક્ષના કાર્યકરો માટે બીજી પક્ષના કાર્યાલયમાં ઘૂસીને હંગામો કરવો યોગ્ય નથી."
કોંગ્રેસે જાહેરમાં વાંધાજનક ટિપ્પણીથી પોતાને દૂર રાખ્યા છે, પરંતુ ભાજપે રાહુલ ગાંધી અને કોંગ્રેસ પાસેથી આ મુદ્દે બિનશરતી માફીની માંગ કરી છે.