પટણા:  બિહારમાં વિપક્ષના નેતા તેજસ્વી યાદવે પોતાની 'મતદાર અધિકાર યાત્રા' પૂર્ણ કરીને પટણા પરત ફર્યા બાદ ભારતીય જનતા પાર્ટી (BJP) પર આકરા પ્રહારો કર્યા છે. પત્રકારો સાથે વાતચીત કરતા તેમણે કહ્યું કે યાત્રાને લોકોનો અપેક્ષા કરતાં વધુ જનસમર્થન મળ્યું છે અને આ યાત્રાનો સંદેશ આખા દેશમાં પહોંચી ગયો છે.
     તેજસ્વી યાદવે ભાજપ પર નિશાન સાધતા કહ્યું કે, ભાજપના લોકો ડરી ગયા છે અને તેથી જ વિરોધાભાસી નિવેદનો આપી રહ્યા છે. તેમણે સ્પષ્ટપણે કહ્યું કે, "ભાજપ ફક્ત નકલ કરી શકે છે, પરંતુ કોઈના વિઝનને અમલમાં મૂકી શકતી નથી." તેમણે ભાજપને "બેશરમ" ગણાવ્યું અને કહ્યું કે તેમનું વિઝન હજુ શરૂ પણ થયું નથી, તેની સાચી શરૂઆત સરકાર બન્યા પછી જ થશે. આ સાથે જ તેમણે પરોક્ષ રીતે ચૂંટણી પંચ પર પણ નિશાન સાધ્યું.
   યાત્રાના છેલ્લા દિવસે, તેજસ્વી યાદવ અને રાહુલ ગાંધીને ભોજપુરના આરામાં ભાજપના કાર્યકરોનો ભારે વિરોધનો સામનો કરવો પડ્યો હતો. યાત્રા આરા પહોંચતા જ ભાજપના કાર્યકરોએ કાળા ઝંડા લહેરાવ્યા અને 'મોદી ઝિંદાબાદ' તથા 'રાહુલ ગાંધી મુર્દાબાદ'ના નારા લગાવ્યા હતા. આ ઘટના દરમિયાન બંને પક્ષો વચ્ચે ભારે હોબાળો થયો હતો.
 તેજસ્વી યાદવે આ પ્રદર્શનોને વિરોધ પક્ષની નબળાઈ ગણાવી અને ભારપૂર્વક કહ્યું કે તેમનું વિઝન ફક્ત લોકોના સમર્થનથી જ સફળ થશે.