વોશિંગ્‍ટન, તા.૧: અમેરિકાના રાષ્‍ટ્રપતિના વ્‍યાપારી સલાહકાર પીટર નવારોએ ભારતની રશિયન તેલની ખરીદીને લઈને ફરી એક વાર તીખું નિવેદન આપ્‍યું છે. એક અખબારી વાતચીતમાં નવારોએ કહ્યું છે કે ‘બ્રાહ્મણ' ભારતીય લોકોના ખર્ચે ભારે નફો કમાઈ રહ્યા છે અને તેને ‘રોકવાની' જરૂર છે. જોકે બ્રાહ્મણ શબ્‍દ તેમણે કયા સંદર્ભમાં વાપર્યો તેની કોઈ સ્‍પષ્ટતા થઈ નથી.

ટ્રમ્‍પ વહીવટના વ્‍યાપાર અને ઉત્‍પાદન વિષયોના વરિષ્ઠ સલાહકાર નવારોએ ફોક્‍સ ન્‍યૂઝ સન્‍ડેને આપેલા એક મુલાકાતમાં કહ્યું,ૅજુઓ, વડા પ્રધાન મોદી એક મહાન નેતા છે. આ સમજાતું નથી કે ભારતીય નેતા રશિયન રાષ્‍ટ્રપતિ વ્‍લાદિમીર પુતિન અને ચીની રાષ્‍ટ્રપતિ શી જિનપિંગ સાથે કેવી રીતે સહયોગ કરી રહ્યા છે? જ્‍યારે ભારત વિશ્વનું સૌથી મોટું લોકશાહી છે.

નવારોએ ચેનલને કહ્યું, તો હું માત્ર આટલું જ કહીશ કે, ભારતીય લોકો, કળપા કરીને સમજો કે અહીં શું થઈ રહ્યું છે. બ્રાહ્મણ, ભારતીય લોકોના ખર્ચે મુનાફો કમાઈ રહ્યા છે. આપણે તેને રોકવું પડશે.

રાષ્‍ટ્રપતિ ડોનાલ્‍ડ ટ્રમ્‍પની વ્‍યાપાર અને કરવેરા નીતિઓને લઈને અમેરિકા અને ભારત વચ્‍ચેના સંબંધોમાં આવેલા તિરાડ પછી નવારો છેલ્લા કેટલાક દિવસોથી સતત ભારત પર નિશાન સાધી રહ્યા છે. ટ્રમ્‍પે ભારત પર પચીસ ટકા પારસ્‍પરિક કરવેરો લગાવ્‍યો હતો. પછી ભારતની રશિયન તેલ ખરીદી સંદર્ભે પચીસ ટકા વધારાનો કરવેરો લગાવ્‍યો છે. જ્‍યારે ભારતે તેના પર લાગુ કરવેરાને અનુચિત અને અવ્‍યવહારુ ગણાવ્‍યો છે અને કહ્યું છે કે તે જ્‍યાંથી પણ સસ્‍તું તેલ મળશે, ખરીદવું ચાલુ રાખશે.

નવારોએ પૂછવામાં આવ્‍યું કે શું માત્ર ભારત પર વધારાના કરવેરાથી પુતિન નિયંત્રણમાં આવી જશે, કારણ કે રશિયન તેલ તો ચીન પણ ખરીદે છે. આના જવાબમાં નવારોએ કહ્યું, સારું, એક વાત સ્‍પષ્ટ છે કે ભારત પર અત્‍યારે પચાસ ટકા કરવેરો છે, પરંતુ ચીન પર પણ પચાસ ટકાથી થોડો વધુ કરવેરો છે. તો પ્રશ્‍ન એ છે કે આપણે તેને કેટલો વધુ વધારવા માંગીએ છીએ જેથી આપણે પોતાની જાતને નુકસાન ન પહોંચાડીએ?

નવારોએ કહ્યું કે ફેબ્રુઆરી ૨૦૨૨માં પુતિનના યુક્રેન પર હુમલા પહેલા, ભારત રશિયન તેલ ખરીદતું નહોતું. નવારોએ કહ્યું, તો પછી શું થયું? સારું, રશિયન શુદ્ધિકરણ કારખાનાઓ ભારતમાં ઘૂસી ગયા અને મોટી તેલ કંપનીઓ સાથે જોડાણ કરી લીધું. પુતિન મોદીને કાચા તેલ પર છૂટ આપે છે. તેઓ તેને શુદ્ધ કરે છે અને શુદ્ધ કરેલું તેલ (ઈંધણ) યુરોપ, આફ્રિકા અને એશિયામાં મોટા પ્રીમિયમ લઈને - મોટો નફો લઈને મોકલે છે અને ખૂબ પૈસા કમાય છે.

નવારોએ કહ્યું, તો તેમાં ખોટું શું છે? પોતે જ જવાબ આપતા કહ્યું કે વાસ્‍તવમાં તેનાથી રશિયન યુદ્ધ મશીનને બળ મળે છે. રશિયાથી કાચા તેલની ખરીદીનું રક્ષણ કરતા ભારત આ કહેતું રહ્યું છે કે તેની ઉર્જા ખરીદી રાષ્‍ટ્રીય હિતથી પ્રેરિત છે. યુક્રેન પર હુમલા પછી પﾍમિી દેશોએ રશિયાના કાચા તેલ પર પ્રતિબંધ મૂકયા હતા. તે પછીથી રશિયા ભારતનું ટોચનું ઉર્જા પુરવઠો પુરુ કરનાર બની ગયું છે.

નવારોએ આરોપ લગાવ્‍યો, આ યુક્રેનના લોકોને નુકસાન પહોંચાડે છે. અને કરદાતાઓ તરીકે આપણે જે કરવું છે તે એ છે કે આપણે તેમને વધુ પૈસા મોકલવા પડશે જેથી યુક્રેન પોતાનું રક્ષણ કરી શકે. અને તેના ઉપરાંત, પચાસ ટકામાંથી પચીસ ટકા તેથી છે કારણ કે ભારત કરવેરાનું મહારાજા છે. તેઓએ દાવો કર્યો, દુનિયામાં સૌથી વધુ કરવેરા તે જ (ભારત) લગાવે છે. તેથી તેઓ આપણને ઘણી બધી વસ્‍તુઓ નિકાસ કરે છે, અને આપણને તેમને વેચવા દેતા નથી. તો નુકસાન કોને થશે? અમેરિકી મજૂરોને, અમેરિકી કરદાતાઓને અને રશિયન ડ્રોન હુમલામાં મરી જતા યુક્રેનના લોકોને.

પીટર નવારો આ પહેલા પણ યુક્રેન યુદ્ધને લઈને ભારત અને વડા પ્રધાન મોદીની ટીકા કરી ચૂકયા છે. તેમણે આ પહેલા યુક્રેન સંઘર્ષને મોદીનું યુદ્ધ કહ્યું હતું. ગયા અઠવાડિયે બુધવારે અમેરિકી કરવેરાના નવી દરો અમલમાં આવ્‍યા પછીના કેટલાક કલાકોમાં જ પીટર નવારોએ ભારત વિરુદ્ધ આકરો હુમલો કર્યો હતો.

નવારોએ તો બ્‍લૂમ્‍બર્ગ ટીવી પરની વાતચીતમાં ત્‍યાં સુધી કહી દીધું કે રશિયા-યુક્રેનનું યુદ્ધ વાસ્‍તવમાં મોદીનું યુદ્ધ છે. નવારોએ કહ્યું, ભારત જે કરી રહ્યું છે, તેના કારણે અમેરિકામાં દરેક વ્‍યક્‍તિ નુકસાન ઉઠાવે છે. ઉપભોક્‍તા અને વ્‍યવસાયો બધા નુકસાનમાં છે, અને શ્રમિકો પણ તેથી નુકસાન ઉઠાવે છે કારણ કે ભારતના ઊંચા કરવેરા આપણી નોકરીઓ, કારખાનાઓ, કમાણી અને વધુ સારા વેતનના અવસરોને ઘટાડે છે અને એટલું જ નહીં ત્‍યાર પછી કર ચૂકવનારાઓને પણ નુકસાન થાય છે કારણ કે આપણે મોદીના યુદ્ધ માટે પૈસા આપવા પડે છે.

જ્‍યારે બ્‍લૂમ્‍બર્ગે તેમને પૂછયું કે શું તેમનો અર્થ પુતિનનું યુદ્ધ હતો? તો નવારોએ કહ્યું, મારો અર્થ મોદીનું યુદ્ધ જ છે, કારણ કે શાંતિનો માર્ગ કેટલીક હદે નવી દિલ્‍હીમાંથી પસાર થાય છે.

 તેઓએ આ મુલાકાતમાં આગળ કહ્યું, મને જે વાત પરેશાન કરે છે તે એ છે કે ભારતીયો આ મુદ્દે ખૂબ અહંકારી છે. તેઓ કહે છે, અરે, અમારી પાસે ઊંચા કરવેરા નથી... અરે, આ અમારી સાર્વભૌમત્‍વ છે. અમે જ્‍યાંથી ઈચ્‍છીએ, જેની પાસેથી ઈચ્‍છીએ તેલ ખરીદી શકીએ છીએ. ભારત, તમે વિશ્વનું સૌથી મોટું લોકશાહી છો, સારું, તમને ઠીક લાગે તેમ જ વર્તન કરો. (રર.૧૭)